Мордовскяй делегациять руководителец Артём Здунов и сонь коллеганза ванозь производствать мольфтеманц, а стане жа анок продукциянь выставкать и предприятиять музеенц. Тяниень пингть заводсь, конань сембе площадканзон лангса работай 6,5 тёжяньда лама ломань, ноляй кемотть аф фкя лацонь модель.
Производствать ваномда башка, мордовскяй делегациясь примась участия промкооперациянь и импортонь полафнемань кизефкснень коряс круглай шраса. Мордовиянь предприятиятне - «Резинотехникась», «Орбитась» и «Саранскяй приборостроительнай заводсь — няфтезь эсь продукцияснон и производствать возможностензон, а стане жа эсь наработкаснон, конатнень лангс ули кода шарфтомс мяль автопромти. Азфоль, што сотрудничендамань кой-кона ширетнень коряс эряви проста эреклафтомс юмафтф соткснень.
Специальнай назначениянь автомобильхнень производстваснон коряс предприятияса - «Автодом» ООО-са мордовскяй делегацияти няфтезь производственнай мощносттнень и «СИМАЗ» пассажирскяй автотранспортть выставканц.
Предприятиясь работай эсь сферасонза 15 кизода ламос ни и тяни ноляй автомобилей 20 лама модель. Тя курокста лездомань машинат и реанимобильхть, специализированнай транспорт шабатнень, ограниченнай возможность мархта ломаттнень усксеманкса, а стане жа лабораторият МВД-ти, МЧС-ти, РЖД-ти, ки лангонь и аварийно-спасательнай службатненди.
Производственнай мощносттнень ваномста шарьхкотьфтольхть сотрудничендамань ширетне. Кепотьксонди, азфоль мяль спецавтомобильхнень потмоширдень освещениянь системать комплектовандамста нолямс тевс светонь мордовскяй источникнень, а реанимобильса заводской оснащениянь стадияса латцемс саранскяй производствань рециркуляторхт.
Мордовия Республикань Оцюнять пресс-службац