Республикань Образованиянь министерствать информациянц коряс, Мордовиянь тонафнемань организациятнень 100 процентсна анокт тонафнемань од кизоти. Тя идень саттне, школатне, дополнительнай и средняй профессиональнай образованиянь учреждениятне.
74,5 тёжянь школьниксь озайхть партатнень вакс тонафнемань од кизоня – тя тёжянь ломаньда сяда лама ётай кизоть коряс. А вов васенце классу молида сяда кржа тяда ингольдень кизотнень коряс, - 7,5 тёжянь шаба.
Минобразованиять контроленц ала – учебникнень и учебнай пособиятнень доступностьсна. «Сембе эрявикс учебнай комплекттнень мархта тонафнихне обеспечендафт ни», - китькстазе республикань образованиянь министрсь Елена Солдатова. Средстватне тянкса Мордовиянь Оцюнять поручениянц коряс арьсефтольхть республиканскяй бюджетть эса.
Пцтай анокт школьнай автобусне. Тядде школьнай маршруттнень эса тевс нолдави техникань 246 единица, сембонь тевс нолямань пингсна аф 10 кизода кржа, кода и ладяф. Тяда башка, сексенда республикав дополнительна поступайхть 27 школьнай од автобус. Водителень штатсь пяшкотьф 100 процентта.
Мордовиянь Оцюнясь шарфтсь мяль безопасностень кизефкснень лангс. Республикань образованиянь объекттнень 100 процентсна обеспечендафт охранаса, стационарнай металлоискательса и пожарнай сигнализацияса, организациятнень 82 процентсна – видеонаблюдениянь системаса. Содамошинь карша тонафнемань организациятнень эса виияфтовихть противопожарнай и антитеррористическяй безопасностень мератне.
Аф юксневи и эпидемиологическяй безопасностсь: тонафнемань од кизоть карша ётафтови оцю работа школьнай персоналть ПЦР-тестированиянц и вакцинациянц коряс – и коронавирусть, и гриппть каршес.
Мордовия Республикань Оцюнять пресс-службац