Саранскяйса ётасть илат, конат лемтьфт святой праведнай воинть Феодор Ушаковонь канонизацияста 20 кизонь топодемати. Кафедральнай Соборть ваксса ульсь божественнай литургия, конань етафтозь Санкт-Петербургскяй и Ладожскяй митрополитсь Варсонофий, Саранскяй и Мордовскяй митрополитсь Зиновий и Русскяй православнай церькавонь лия архиерейхне. Литургиять пингста тифоль крестнай ход и илань молебен апак сяськ адмиралть кевронгонц ваксса. Тяда меле кевронгти путфтольхть панчфт. Тяса ульсь и Мордовиянь Оцюнять тевонзон топафтысна Артём Здунов, а стане жа республикань Правительствав сувсихне, РФ-нь Оборонань министерствань, Русскяй православнай церькавонь представительхне. Кайгсь Россиять гимнац, сонь моразе Санкт-Петербургста Россиянь Военно-Морской флотонь Н.А.Римскяй-Корсаковонь лемса Центральнай концертнай образцовай оркестрась.
Кафедральнай соборть малас пуромкшнесь лама ломаньда, етксост республикань эряйхть и инжихть марнек Россияста.
Мероприятиянь участникнень лемс приветствия кучсь Приволжскяй Федеральнай округса РФ-нь Президентть полномочнай представителец Игорь Комаров, поздравлениянь валхт мярьгсь азомда РФ-нь Президентть Администрациянц вятиенц васенце заместителец Сергей Кириенко и властень федеральнай оргаттнень лия вятисна, а стане жа Москувонь и сембе Русень патриархсь Кирилл.
«Военно-Морской флотонь, Оборонань министерствань, Государственнай Думань вятихне кучсть поздравленият, састь тя ведомстватнень представительсна, мезсь корхтай Российскяй Федерацияти тячиень илать оцю смузенц колга, - мярьгсь Артём Алексеевич. – Минь адмиралоньке содаф аф аньцек эсь сяськондеманзон мархта – сон содаф сянь коряс, што ломаттненди пяк эрявикс пингста тюрсь чумать каршес, панчсь госпиталь Темниковскяй районца стака кизотнень. А мзярда синь ульсть теждякс минь странаньконди? Но кда минь служатама Шкабавазти, служатама ломаттненди, минь фалу мутама лисема васта сембода стака паластовок».
Поздравлениянь валхт азсь Федеральнай Собраниянь Советонь Федерациянь членць Сергей Кисляк.
«Феодор Ушаков мзярдовок ашезь веше содафши, сон кирдсь ширеса политическяй интригатнень эзда. Сон ульсь скромнай, пара вайме ломанькс. Аф эрти максф кирдемс войнань стакатнень-сталмотнень и тяка пингть ванфтомс ару ваймонц. Мордовияти ули кода марямс инксонза гордость!» - китькстазе Сергей Кисляк.
Оцю инжикс иласа ульсть Госдумань и Федерациянь Советонь представительхне Василий Пискарёв, Александр Воробьёв, Владимир Литюшкин, «Женщины за жизнь» благотворительнай фондть вятиец Наталья Москвитина.
Официальнай пяльксть шумордамда меле Мордовиянь Оцюнять аф лама пингс тевонзон тиендисна корхнесь республикань эряйхнень и инжихнень мархта, а стане жа ванозе выставкать, коса эсь работаснон няфтезь Ф.В.Сычковонь лемса Саранскяй художественнай училищань тонафнихне и Мордовия Республикань художниконь Союзонь члеттне.
Соборть маласа пуроптфоль выставка, коса няфтьфтольхть Ф.В.Сычковонь лемса Саранскяень художественнай училищань тонафнихнень и Мордовия Республикань художниконь Союзти сувсихнень работасна. Святой праведнай воинти Феодор Ушаковонди лемтьф выставка стане жа пуроптф Воронинонь лемса краеведческяй музейса. Тяса ули кода няемс адмиралть личнай паршиенза. Выставкась кармай покодема 30 сентябрть самс.
Мордовия Республикань Оцюнять пресс-службац