20 январьста Республикань Кудса панжевсь предпринимательхненди «ЗаБизнес: рейтинг регионов» марнек Россиянь конференциясь.
Конференцияса примасть участия «Платформа для работы с обращениями предпринимателей «ЗаБизнес.РФ» АНО-ть генеральнай директороц Элина Сидоренко, МР-са предпринимательхнень праваснон коряс уполномоченнайсь Елена Юрченкова, бизнес-сообществань, контрольно-надзорнай и правоохранительнай оргаттнень представительсна.
Мероприятиясь ётафтовсь видеоконференциянь режимса очно-дистанционнай форматса. Участникнень приветствондазень Мордовиянь Оцюнясь Артём Здунов. Республикань вятись лятфтазе, што 2022 кизось регионца азф Предпринимательскяй инициативань кизокс.
«Кармай лама мероприятияда. Но фкя инь васенцесь — аф аньцек корхнемс тя или тона тематнень коряс, а сувафнемс семботь тевс. Тячи минь сембось лиси, сяс мес контрольно-надзорнай оргаттне улихть васедемасонк. Мархтонк прокуратурась, Внутренняй тевонь министерствась, Следственнай управлениясь. Ванцаськ пичефти сембе кизефкснень. «Забизнес.рф» федеральнай платформась максси предпринимательхненди улемс сатфксонь сатникс и курокста сатнемс эрявикс лезкс».
Элина Сидоренко лятфтазе: «ЗаБизнес.РФ» платформась нолдафоль тевс Президентть Владимир Путинонь поручениянц мяльса кирдезь.
Тяниень пингть платформать эса кемокстаф 3 тёжяньда лама предприниматель.
«Минь няйсаськ, што тячи Мордовиясь — тя регион, кона панжада предпринимательскяй сообществати, няйсаськ, што бизнесть и властть ёткса соткссь лезни решандакшнемс предпринимательхнень инголе ащи задачатнень», - мярьгсь сон.
Пуромксть пингста кемокстафоль марстонь покодемань вятемать коряс соглашения Мордовиянь Правительствать и «Платформа для работы с обращениями предпринимателей «ЗаБизнес.РФ» АНО-ть ёткса. Стане жа кемокстафтольхть соглашеният республикань деловой сообществать и Мордовия Республикаса предпринимательхнень праваснон араламаснон коряс Уполномоченнайть ёткса.
Васедемати итогонь тиемста Мордовиянь Оцюнясь китькстазе: кда ули шарьхкодема, эста покодемс ламода сяда тёждя — кода властти, стане и предпринимательхненди.
«Васендакиге кирдема мяльса вов мезсь — аф сёпондомат прябалатне, азонкшнема колгаст, бизнести ули кода тиемс тянь и васедеманьконь пингста, и тя платформать вельде», - мярьгсь Артём Здунов.
Мордовия Республикань Оцюнять пресс-службац