Ульсь китькстаф, што Мордовиясь Россиянь просвещениянь Министерствать кирдеманц видеса эрязста примси участия «Семья» и «Молодежь и дети» нацпроекттнень программаса - 2025 кизоста сявомок 2027 кизоти молемс кармай педа пес петьф Мордовиянь образовательнай учреждениянь 75 здания: 14 идень сад, 56 школа и ниле СПО-нь учрежденият. Нят цельхнень лангс кармай максф 6 млрд 972 млн цалковай, ярмаконь оцю пялькссь – тя федеральнай бюджетть кирдемац.
Тя кизоть капремонтсь кармай ётафтф 14 объектса – 10 школа, кафта идень садт и кафта техникупт. Васенцеда нацпроекттнень видеса идень садга капремонтсь кармай ётафневома 14 работань видтнень коряс, дошколятатне покодематнень ингста кармайхть ётафтфт лия маластонь садтненди.
«Образовательнай учреждениянь тяфтама лувкс республикаса капремонтть коряс программать сембе пингстонза нинге ащезь одкстопнев, - китькстазе Галина Лотванова. – Региоттнень инголе 2030 кизоти путф задача петемс сембе образовательнай организациятнень, конатненди эряви капремонт, и тиемс фкя лаца цебярь условият сембе идтненди».
Лятфтасаськ, што 2022 кизоста школань педа пес петемань оцю федеральнай программать видеса Мордовияса петьф 36 школа (38 здания), конатнень эзда 20 зданиясь ащихть велева – синь эсост тонафнихть 8 тежяньда лама идь. Марстонь финансированиясь - пцтай 3 млрд цалковай.
Елена Солдатова китькстазе, што идень садтне и школатне обязательнай порядкаса кармайхть пяшкотьфт оборудованияса, колледжга и техникумга, конат сувафтфт путф пингти планц, тя покодемась уже ётафтф «Профессионалитет» федеральнай программать коряс.
«Капремонтти основной требованиясь - предметнай кабинеттнень и потмонь пространствать пяшкодемасна-мазоптомасна – эрь помещениять полафксоц должен работамс идть касфтоманц лангс. Тяфта жа капремонтть программац сувафни эсь эзонза зданиянь фасадтнень одкстоптомаснон и къда тя эряви маластонь территориятнень мазоптомаснон, обязательнай порядкаса –безопасностень комплекснай системать одкстоптомац-виензафтомац», - азондозе министрсь.
«Финансированиянь оцю суммась – тя республикати кемамась. Сянкса эряви видеста молемс контрактонь кемокстамань графикть, проектно-сметнай документациять, сметнай расчеттнень анокламаснон коряс. Сембось эряви вятемс кеме контроль ала! – китькстазе Мордовиянь Оцюнясь. – Школатнень сембе учсазь 1-це сентябрьти – и шачфтыхне, и идтне, а тянди сембе утвержденнай платтнень-графикнень эзда лиседемс аф эряви».
Артём Здунов тяфта жа китькстазе СПО-нь учреждениятнень эса одкстоптомать коряс покодемать эрявиксшинц – сон видеста сотф регионтть предприятиянзон эса кадровай дефицитонь кизефксть пяшкодеманц мархта.
Мордовия Республикань Оцюнять пресс-службац