Кизоньберь республикаса ётафтовсь 500 лама мероприятия, конатнень ёткса «Россиясь – возможностень страна агентствать «Мастера гостеприимства» конкурсоц, Сабантуйсь, «Од профессионалхне» и стак тов. 25 процентта кассь отельхнень эса эряйхнень лувкссна, 30 процентта – республикав туристическяй потоксь. Сембода лама сайда ульсь С.Д.Эрьзянь лемса музеи, Краеведческяй музеи и «Мордовскяй подворьяв», П.Г.Смидовичень лемса заповеднику и «Смольный» национальнай парку.
Важна, што республикась лиссь туристтнень сашендомаснон коряс пандемияда ингольдень уровенти. Пуроптф Мордовиять эзга туристскяй и экскурсионнай 55 маршруттнень эзда реестра. Ётксост авторскяй экскурсият. Российскяй и региональнай туроператорхнень маршрутсна. Россиянь национальнай турмаршрутонь статуссь максф «Зов торамы» ваймама шинь турти. Тя максси проектти получамс федеральнай ширень кирдема. Мекольдень кафта кизоста инвесторхнень мархта республикаса панчф ваймосемань 7 базат. Тя «Каменка» горнолыжнай комплекссь Атяшевскяй районца, «Акшовская усадьба» ваймосемань базась – Старошайговскяй районца, «Карнай» ваймосемань базась – Кочкуровскяй районца.
Мордовияса туризмать виияфнеманц коряс платтне сотфт оцю мероприятиянь ётафтомать и туристическяй инфраструктурать цебярьгофнеманц мархта. 50 тёжяньда лама инжи учендови «Минь марсотама!» од ломанень фестивальс и угро-финскяй народонь всероссийскяй форумс, конат ётафтовихть август ковста. Октябрьста Саранскяйсь примасы событийнай туризмань Всероссийскяй премиять полуфиналонц.
Мордовиясь сувась 44 регионть лувксс, конат получайхть федеральнай грантовай ширень кирдема благоустройстванди, туризмань сфераса предпринимательскяй инициативатнень ширеснон кирдеманкса арьсекшневи нолдамс пцтай 84 миллион цалковай федеральнай средстват. Ладяф вешфкснень коряс петевихть-тиевихть пляшне. Корхтамась мольфтеви пляжнай ваймосемань объекттнень колга кода Саранскяйса, стане и республикань райоттнень эса. Эсь предложенияснон азозь Большеберезниковскяй, Ичалковскяй, Старошайговскяй, Рузаевскяй, Кочкуровскяй и Темниковскяй райононь оцюнятне.
Проекттнень пялькссна лездыхть цебярьгофтомс «Зов торамы» национальнай туристическяй маршрутса инфраструктурать. Ваймосема шинь тя турсь сувафтф Россиянь национальнай маршруттнень лувксс.
Артём Здунов путсь задача – водендакшнемс Мордовиянь туристическяй сетьти сембе муниципальнай райоттнень: «Эрьть эса ули мезе няфтемс, коса улемс, улихть соцень эсь лацоньширенза – важна синь мумс и тиемс мялень шарфты вастокс».
Мордовия Республикань Оцюнять пресс-службац