15 майста Саранскяень Ледовай дворецса Мордовиянь Оцюнять аф лама пингс тевонзон тиендиснон Артём Здуновонь ширенц кирдеманц пингста етась Мордовиянь сборнайть и Офицерскяй хоккейнай лигань «POLICEMAN» хоккейнай клубть благотворительнай матчсна. Турнирть аноклаец-етафтыец Международнай Полицейскяй Ассоциациянь Российскяй секциясь. Пялькстомась лемдевсь святой праведнай воинть Феодор Ушаковонь канонизацияста 20 кизонь топодемати.
Налхкихненди и болельщикненди региононь вятить лемста пшкядемста МР-нь Правительствать Председателенц тевонзон тиендисна Владимир Сидоров поздравляндазень сембонь Мордовияв оцю хоккейть мрдаманц мархта, азозе, што спортивнай иласа примайхть участия хоккейть коряс Мордовиянь СШОР-нь од воспитанникне и шабат шклатнень-интернаттнень эзда.
Матчта инголе ушеткшни хоккеисттненди мастер-класс етафтсть «Динамонь» легендатне Василий Первыхин, Сергей Петренко и Мисхат Фахрутдинов. Синь работасть шабатнень мархта налхкомань техникать коряс и няфтсть кой-кодама профессиональнай приепт.
Идень кудонь и школань-интернатонь воспитанникненди максфтольхть казнет турниронь шефнень и спонсорхнень эзда, синь лувкссост спортинвентарь, бытовой и музыкальнай техника.
Тяда башка, тя шиня казьфоль «Мордовия 2007» командась – 2020/2021 сезононь хоккейть коряс Приволжскяй федеральнай округонь первенствань сяськись. Республикань сборнайсь сатозе васенце вастть, сон ашезь сяськов фкявок налхкомаса, конатнень эзда ульсь комозь! Мордовиянь од ломанень хоккейть историяса васенцеда региононь командась лиссь А группати и сай сезонть васеди тяфтама соперник мархта, кода АкБарс (Казань), Динамо (Казань), Торпедо (Нижняй Новгород), Салават Юлаев (Уфа) и лиятне.
Международнай Полицейскяй Ассоциациянь российскяй секциять президентоц, генера-лейтенантсь Юрий Жданов китькстазе, што од ломанень спортсь виияфнема сяда товга, а инь цебярьхне тердевихть «Динамо» московскяй командати и од ломанень сборнайти.
Васедемаса 9:5 счетса сяськсть инжихне.