Ведомствань руководительть валонзон коряс, регионца марстонь инфекционнай заболеваемостсь кассь – ковидонь эпидемиять, ОРВИ-ть, аф больничнай пневмониятнень сюнеда. Тяка пингть кишечнай инфекциятнень коряс сярядихнень лувкссна кирсь – тянди лездсть ограничительнай мероприятиятне. Стане жа отмечафоль природно-очаговай инфекциятнень виензамасна – кепотьксонди, геморрагическяй лихорадкать, клещевой баррелиозть, сяс муниципалитеттнень мархта Роспотребнадзорсь сяда тов поладсы лаймонзитнень эзда территориятнень обработкаснон коряс работать.
Симома ведть качестванц колга корхтамста Татьяна Харитонова отмечазе, што эсонза касф фторть и кемошить лувкссна. Сяс, тяконь лувксса «Ару ведь» нацпроектть мяльса кирдезь марса ресурсоснабжающай организациятнень мархта мольфтеви работа тя показательхнень цебярьгофнемаснон коряс.
«Тяниень пингть сувафнетяма тевс симома ведть коряс интерактивнай карта, сон работай марнек Россиять эзга. Ведсь эрь населённай пунктса кармай ванондовама кизоти весть. Республикань эряйхненди ули кода няемс симома ведть качественнай показателензон эрь кодама населённай пунктса», - азозе Татьяна Харитонова.
Башка мяль докладть эса шарфтф атмосфернай кожфть мониторингонцты, кона ётафневи эрь кизоня. Тядде пеняцяматнень поступамста, башка Химмашень эряйхнень эзда, шинек-венек мольфтеви мониторингсь арась сяда крхкакс.
«Муме лувксонь касома пцтай кемонцьке точкатнень коряс, коста сявфтольхть пробатне. Кой-кона показательхнень коряс, тяконь лувксса аммиакть и сероводородть, ПДК-сь аф сатф, но 0,5 ПДК ули – тя рдазыямань ся уровенць, мзярда веществать аф мушендсаськ, но шинеть марсесаськ. Рдазыямань источникне, арьсемас коре, – тя Ветсанутильзаводсь, очистной сооружениятне и Мордовбитумсь – азозе Мордовиять эзга Роспотребнаадзорть руководителец. И поладозе, што сяда лац содави исследованияда меле, конань ётафтсазь МР-ть эзга Роспотребнадзоронь Управлениянь специалисттне.
Эряви азомс, што пробатнень лувкссна, конат аф отвечайхть норматненди, кирсь. «Пеняцямада арась сяда кржа. Атмосфернай кожфть мониторингоц миньцонк мольфтеви ветембавок. Мониторингть карматама мольфтемонза сяда тов. Модать коряс результаттне улихть анокт недялять аделавомс».