Посёлкань эряйсь Галина Егорова азозе: «Минь пяк ламос учендоме, мзярда тейнек строяйхть од клуб. Миньцонк сон ашель комозьда лама киза, ся пингста, кода сёлговсь таштсь. Афи верондаме, што колганк лятфтайхть. Но сюкпря республикань Оцюняти Артём Алексеевич Здуновонди – сон кирдезе ширеньконь. Тя кизонь тунданя ушетфоль строямась, и вов тячи миньцонк ила! Культурань афкуксонь дворец тяни Барашеваса – тяса и библиотека, и стамань мастерской ули, и нинге лама мезе, мезьса ули кода занцемс пря и шабатненди, и оцюфненди».
ДК-ть панжема и патриотическяй моронь фестивальть финалс сашендсь Мордовиянь Оцюнясь Артём Здунов. Марса республикань культурань министрть и Теньгушевскяй райононь оцюнять Ольга Куткинать мархта сон ванозе од зданиять, корхнесь художественнай самодеятельностень участникнень, шабатнень и преподавательхнень, машты кядь аватнень и декоративно-прикладной творчествань мастерхнень мархта. Стамань мастерскойса региононь руководительти няфтезь, кода мольфтеви пряс щаматнень – балаклаватнень стамасна, конат меле прважавихть специальнай военнай операциянь ётафтома васттненди. Васенце партиясь прважаф ни боецненди. Кода и рисункатне и сёрматне школьникнень эзда. Библиотекаса и изобразительнай искусствань студияса Мордовиянь Оцюнясь корхнесь шабатнень мархта, конат аноклайхть посланият военнослужащайхненди.
Патриотическяй моронь фестивальть финалса примасть участия сядода лама артистсь республикань кота аймакста: Теньгушевскяй, Краснослободскяй, Зубово-Полянскяй, Ельниковскяй и Темниковскяй райоттнень эзда.
«Минь сембе пяк учендоме тя событиять эса, - сценать лангста пшкядсь Мордовиянь Оцюнясь посёлкань эряйхненди и фестивалень инжихненди. – Ульсь аф кржа наказда имена тяфтама сооружениять строяманц коряс. Мялезе сембонь эзда спасибамс Президентоньконди Владимир Владимирович Путинонди сянкса, мес ули «Культура» национальнай проектсь. Тяддесь Президентть мархта азф Культурань и искусствань кизокс. Пяк важна нолдамс эряф велень тя клубти. Важна, штоба тяса улель цебярь творческяй коллектив. И пяк пара, мес панжемстонза тяса ётафтови «Минь марса – Россия!» фестивальсь. Сюкпря тяфтама мазы ушетксонкса. Лувондса, што тя фестивальсь эряви ётафнемс эрь кизоня».
Фестивальс тертьфтольхть ветераттне, тяконь лувксса Афганистанца, Чечняса, Сирияса боевой действиянь участникне, а стане жа мобилизованнайхнень семьясна.
«Тячи мон получань очередной видеоролик боецоньконь эзда. Сембода лама синь корхнесть ширень кирдемань сёрматнень, рисункатнень квалма, конатнень получсесазь школьникнень эзда. Тяса мон няине эсь сельмосон, кода сембось тя тиендеви, сяс эрьда карматама полаткшнемонза тя пара койть. Минь цёраньконди тяниень пингть эряви ширень кирдеманьке», - мярьгсь Артём Здунов.
Теньгушевскяй райононь оцюнясь Ольга Куткина Барашево посёлкань сембе эряйхнень лемста спасибась республикань руководительти территориять ширенц кирнеманкса.
«Тя кизоня ширень кирдемацень вельде минь тиеме районца сняра, мзяра тяда инголе тиендеме 10 кизоста. Стройсеме кит, занцеме пря петемань-мазоптомань тефнень мархта. Барашево посёлкаса ДК-да башка тиеме ваймосемань васта и идень спортивно-игровой площадка. Карматама полаткшнемонза тя работать, планоньке сай пингонди оцюфт», - мярьгсь сон.
Мордовия Республикань Оцюнять пресс-службац