Лятфтасаськ, ётай недялять Мордовияса лоткафтфоль обязательнай масочнай режимсь. Тяни ваймонь таргсемань оргаттнень араламань средстватнень каннемаснон рекомендательнай характероц.
Штабть заседанияса азфоль, што коронавирусса сярядихнень лувкссна республикаса лядонды ингольцекс, 11 районць тя показательть коряс ингольцекс лядондыхть якстерь зонаса, ковиднай госпитальса пчксида сяда кржа аф арси.
Тяка пингть таколдомат эвондафни ся, што республикаса кири коллективнай иммунитетсь. Кафта ковста сон кирсь 137 тёжянь ломаньда. Кда тяфта кармай сяда товга, эста сёксенда регионца может виензамс урмась. Сяс муниципальнай райононь оцюнятненди и медицинскяй учреждениянь главнай врачненди мярькф виияфтомс населениять вакцинациянц и ревакцинациянц коряс работать. Васендакиге тя канневи Саранск ошти, Зубово-Полянскяй, Ромодановскяй, Ельниковскяй, Ковылкинскяй, Чамзинскя и Лямбирскяй райоттненди.
Нинге фкя пяк важнай задачась – коронавирусса сярятьф ломаттнень крхка диспансеризацияснон ётафтомац. Кизоть ушетксста сявомок сонь ётазь аньцек 22 тёжянь ломанць – тя пяк ёмла показательсь. Тяниень пингть, мзярс максси тиемс тянь эпидемиологическяй обстановкась, диспансеризациясь эряви виияфтомс. Штабть сяда товолдонь заседаниясонза райононь оцюнятне должетт пачфтемс тиф работаснон колга.
Мордовия Республикань Оцюнять пресс-службац