Сон азозе, што целайнек сярядихнень мархта ситуациясь регионца ашезь полафта, шиньберьф урмаськоткшни 36 ломань.
«Аф карматама васькафневома – ковидсь ашезь пота. Тяка пингть, инголет Единай государственнай экзаменць и иттнень шумбрашинь кемоксни ваймосемасна. Лоткафтфт кой-кона ограничениятне, сяс башка мяль шарфтома диспансеризацияти», - мярьгсь региононь руководительсь.
Мордовиянь Правительствать Председателенц заместителец Галина Лотванова азозе, што ситуациясь лядонды стабильнайкс и кирдевомшка контроль ала. Республикаса тяниень пингть стационарса пчксихть 241 ломанць, ковиднай койка-васттнень 20 процентсна ащихть резерваса.
Сон стане жа отмечазе, што вакцинациянь темпне ётай недялять кирсть Мордовиянь 19 районца, 4 райоттне ашезь нолда киремать. Коллективнай иммунитетсь регионца – пцтай 48 процент. Галина Лотванова шарфтозе республикань Минздравть и муниципальнай образованиянь оцюнятнень мяльснон сянди, што эряви сяда виста мольфтемс ломаттнень ревакцинацияснон.
Стане жа шарфтома оцю мяль диспансеризацияти. Сон ётафтома 209 тёжянь ломанти, тяконь лувксса и сятненди, кие сярядсь коронавируснай инфекцияса.
Тяда башка, корхтафоль республикань образованиянь учреждениятнень эса тонафнемань процессть шумордаманц колга. 9 класснень эса ушедовсть итоговай экзаметтне, 21 майста 11 классонь шумордайхнень ётафтовихть мекольце звоноксна. Сай недялять ушедовихть ЕГЭ-тне.
Июньцта Мордовияса ушедыхть работама пришкольнай и шумбрашинь петни лагерьхне. Тяни мольфтеви синь примамасна. Сотрудникненди обязательна ётама ПЦР-тестирования, вакцинация и ревакцинация лагерьхнень ушедома карша.
Мордовия Республикань Оцюнять пресс-службац