Корхтафоль социальнай догазификациянь программать колга. Тячиень шити тянкса республикаса кемокстаф 3859 договор. 3224-ть коряс — газсь ётафтф модань участкатнень границазост, 2257 кудти нолдаф сенем толнясь. МР-нь Правительствать Председателенц заместителец, энергетикань и ЖКХ-нь министрсь Игорь Чадов пачфтезе, што догазификациясь регионца мольфтеви графикс коре, работаса заняф 38 специализированнай бригада. Тя недялять газсь эвондай нинге 52 кудть эса.
Финансонь министрсь Сергей Тюркин азондсь налоговай потенциалть касфнеманц коряс государственнай властень исполнительнай оргаттнень и местнай самоуправлениянь оргаттнень работаснон колга. 10 ковста республикать консолидированнай бюджетозонза налоговай и аф налоговай поступлениятне арасть пцтай 34 миллиард цалковай, мезсь 5 миллиартт цалковайда сяда лама ётай кизонь тяка пингть коряс.
Торбеевскяй райононь оцюнясь Сергей Шичкин азондсь муниципалитетть виияфнеманц коряс платтнень колга. Кизоть ушедомста районць касфтозень эсь дохоттнень и аф бюджетнай инвестициятнень объёмснон. Перерабатывающай предприятиятнень эса эряфс ётафневихть инвестиционнай проектт, конат лезнихть панчсемс дополнительнай рабочай вастт. Работай «Девятаев — мяляфтомань вастт» туристическяй маршрутсь, арьсекшневихть туристтненди лия программатка. Нацпроекттнень и госпрограмматнень мяльса кирдезь мольфтеви культурань районнай кудть реконструкцияц, петьф-мазоптф Торбееваса центральнай прудть трвац, петьфт-тифт кой-кона китне. Аварийнай эряма вастса ломаттнень ётафтомаснон коряс программать вельде шумордама лангса 30 квартирань кудть строямац.