Александр Баринов макссь цебярь оценка Мордовияса ляйхнень шудема вастснон ароптомаснон и гидротехническяй сооружениятнень капитальнайста петемаснон коряс мольфтеви работатненди. Регионозонк рабочай поездканц пингста сон ванозень кой-кона ведень объекттнень, тяконь лувксса Саранка ляйть участканц.
«Ошти тя важнай и стака объект. Теенза эряви мялень шарфтома аф аньцек ошень, но и республиканскяй власттнень ширде, - отмечазе Александр Баринов. – Минь мархтонт сявоме лангозонк серьёзнай обязательстват республикань ведень объекттнень ароптомаснон коряс. Тя арась туфталкс республикати дополнительна 48 миллион цалковаень нолдамати».
Ведомствань руководительсь китькстазе, што ошень власттненди эряви лац-ряц ётафтомс инвентаризация Саранкать шудема вастонц видеса модань участкатненди, мумс аф законц коре заняфнень, анокламс разрешительнай сембе документациять, штоба эсь пингстонза нолдамс тевс шудема вастть ароптоманкса максф ярмакнень – 30 миллион цалковайть.
Тядденди Мордовияса арьсефт мероприятият 9 объекттнень эса 127 миллион цалковаень марстонь питнес. МР-нь вирень, охотничьяй хозяйствань и природопользованиянь министрсь Алексей Ларькин пачфтезе, што Саранкада башка ароптови нинге Краснослободскяй и Ковылкинскяй райоттнень территорияса Мокша ляйть шудема вастоц. Тяфтама жа работат мольфтевихть Ельниковскяй районца Ёмла Варма и Ичалковскяй районца Куря ляйть эса.
Стане жа мольфтевихть гидротехническяй сооружениятнень капитальнайста петемаснон коряс работат Лямбирскяй, Краснослободскяй, Большеберезниковскяй райоттнень эса и Саранскяйса.
Дополнительнай финансированиясь, кона нолдаф регионти, лезды кирьфтамс кой-кона объекттнень эса работатнень пяшкодемань пингть и шумордамс синь тядде.
Алексей Ларькин азондсь стане жа Саранскяйса Тавла и Инсар ляйхнень ароптомаснон колга.
Артём Здунов китькстазе, што азф сембе мероприятиятнень ётафтомста кармай обеспечендаф контроль кода работатнень пяшкодемань пингть, стане и качестваснон мельге.
Мордовия Республикань Оцюнять пресс-службац