Республикань Оцюнясь Артём Здунов пачфтсь «Мордовскяй футбольнай лигать» пуроптоманц колга

Республикань Оцюнясь Артём Здунов пачфтсь «Мордовскяй футбольнай лигать» пуроптоманц колга

Турнирнай налхкоматнень ётафтомста тевс нолдави футболть коряс миронь Чемпионатонь наследиясь – сембе спортивнай инфраструктурась и футбольнай паксятне, конат строяфтольхть мундиальти, тяконь лувксса – «Мордовия Арена» стадионць. Турнирса участвондамати аноклайхть республикань оцю предприятиянь, бизнесонь, властень органонь, IT-сообществань командатне, ветераттне, од ломаттне.

Главнайсь, мезть колга мярьгсь Мордовиянь Оцюнясь: «Паксять лангс лисихть аф легионерхне, а минь цёраньке, конатнень инкса кармайхть пичедема, кода инголи – тядятне-алятне, ялгасна, веленьконь и ошеньконь сембе эряйсна!»

Лигань васенце сезонть арьсекшневи ётафтомс кубковай форматса – васенда налхкоматне группаса, сяда тов плей-офф форматса лихтевихть инь вии командатне. Тевс нолдавихть 18 стадионць.

Финальнай матчне кармайхть «Мордовия Арена» стадионца.

Эрь матчсь арай илакс предприятиятненди, ошненди и велетненди, коса ётафтови турнирсь.
Нинге фкя важнай задачась – кирдемс идень и од ломанень футболть ширенц. Ламоц предприятиятне, конат азсть ни мяль примамс участия лигаса, сявихть шефства идень футбольнай командать лангса, мезсь максы обеспечендамс од ломаттнень экипировкаса, лездомс выездной матчнень, паксятнень кирдемаснон и идень тренерхнень ширеснон кирдеманц мархта. Мордовиясь – фкя и тяка регионць, коса юношескяй командатнень ули ни возможностьсна налхкомс футболса стадионца, коса ётафтовсь мировой футбольнай мундиальсь. Тянь колга азондсь Мордовия Республикань футболонь Федерациять Президентоц Александр Егоров.

Лигань тиемань главнай цельсь, Мордовиянь Оцюнять мяленц коряс – тиемс футболть республикаса «народнайкс», содафокс и лама ломанень пуропникс. Башка мяль сон шарфтсь матчта инголе мялень салай культурнай программать лангс – тиендемс семейнай илат, благотоврительнай ярмаркат, презентацият, народно-художественнай промыслань выставкат.
Республикась арьсекшни тиемс Мордовскяй футбольнай лигать панжадокс – май ковть аделавомс заявкатне кармайхть примсевома Мордовиянь футболонь Федерациять мархта республикань эрь кодама уженяста командатнень эзда, сяда тов и лия регионцта участникнень эздовок.