28 ноябрьста ульсь Мордовия Республикань Правительствать очередной заседанияц. Российскяй Федерациянь Президентть Федеральнай Собранияти и Мордовия Республикань Оцюнять Государственнай Собранияти посланияснон эряфс етафнемаснон коряс действиянь программать пяшкотькшнеманц колга информация мархта заседанияса выступандась Правительствань Председательть заместителец – МР-нь экономикань министрсь Владимир Мазов.
Посланиятнень пяшкотькшнемаснон коряс анализсь цебярь. Тянь кемокснесы республикаса социально-экономическяй ситуациясь. 2016 кизонь январьста-сентябрьста 2015 кизонь тяка пингть коряс кассть показательхне промышленностень, велень хозяйствань, строительствань ламоц отраслятнень эса. Кассь средняйста ковонь зарплатась.
Кассь промышленнай производствась.Кепотьксонди, шуфтста изделиянь производствать коряс промышленнай производствань индекссь пачкодсь 118,1 процентс, транспортнай средствань и оборудованиянь производстваса – 116 процентс, химическяй производстваса – 114,4 процентс, пищевой продуктань производстваса – 112,1 процентс.
Кеняртьфти и лия показательсь. Деятельностень промышленнай виттнень коряс сембе предприятиятнень эзга работада пяшкотьф 110,4 миллиард цалковаень питнеса, тя 106,6 процентта 2015 кизонь январти – сентябрти.
Аф кальдяв сатфкст сатфт ламоц предприятиятнень эса, конатнень еткса»Рузхиммаш» АО-сь, «ЭМ-КАБЕЛЬ» ООО-сь, «Биохимик»ОАО-сь, «Электровыпрямитель» ОАО-сь, «Сарансккабель-оптика» ООО-сь, «Саранский завод «Резинотехника» ОАО-сь.
ПФО-нь региоттнень рейтингса 2016 кизонь январть-августть итокснон коряс республикась занязе васенце вастть строительнай материалхнень, электрооборудованиять, электроннай и оптическяй оборудованиять, пищевой продукциять производстваснон коряс.
Мордовиясь стаки лядонды васенце вастса ПФО-нь и Россиянь региоттнень еткса сиволень, лофцонь, алонь производствать коряс.
Сатфксне сатовсть тяка лувксса и инновационнай предприятиятненди инвестициятнень вельде, синь объемсна пачкодсь 270 миллион цалковайс.
Вятезе заседаниять Мордовия Республикань Правительствать Председателец Владимир Сушков.