РФ-нь вице-премьерсь Дмитрий Чернышенко макссь питне оптическяй волокнать ноляманц коряс Саранскяень заводти

РФ-нь вице-премьерсь Дмитрий Чернышенко макссь питне оптическяй волокнать ноляманц коряс Саранскяень заводти

22 октябрьста Мордовияса улемстонза Россиянь Правительствать Председателенц полафтыец Дмитрий Чернышенко марса республикань Оцюнять Артём Здуновонь и ПФО-са РФ-нь Президентть полномочнай представителенц полафтыенц Алексей Кузьмицкяень мархта ульсь «Оптоволоконные системы» АО-са. Россияса телекоммуникационнай оптическяй волокнать производстванц коряс тя васенце и фкя и тяка заводсь. Корхтамась мольфтевсь предприятиять виияфнеманц колга, тяконь лувксса заводть мощностензон касфнемаснон квалма – 4 миллиотт вайгяльбеста сявомок 10 вайгяльбес молемс.

РФ-нь вице-премьерсь, Мордовия Республикань Оцюнясь и ПФО-са Президентть полпредонц полафтыец ванозь заводть производственнай виенц. Тяса арьсеви ётамс пяшксе циклань технологияти – омба масторонь сырьёсь полафтови отечественнайть мархта. Тя максы нолямс тевс российскяй материалхнень марнек странать эзга интернету оцю скоростьса лисендеманкса.

«Интернету лисемась – тя странань Президентть 42 инициативанзон ёткста фкясь. Оптическяй волокнась тяниень пингть пяк эрявикс материал, васендакиге IT-сфераса. Тяни минь инголенк ащихть оцюдонга оцю задачат цифровой трансформациять коряс, оптическяй волокнать производствац – сембода эрявикс аськолкссь тя арьсематнень пяшкодемаса», - мярьгсь Дмитрий Чернышенко.

Артём Здунов сюконясь РФ-нь вице-премьерти Дмитрий Чернышенконди республикань оптическяй волокнать мишендеманц касфнемаса Мордовиять ширенц кирнеманкса. Тячи Россиянь рынкаса  «Оптиковолоконные Системы» АО-ть  талекац – 24 процент. Предприятиять арьсеманзон мяльса кирдезь, тя кизоня талекать лувксоц касфтови 30 процентс.

«Тейнек эряви ётамс отечественнай материалхненди, тя импортонь полафнемань кизефкс, конань колга тейнек корхни Президентсь. Оптоволокнать производстванц пяшксе цикланцты ётамась Мордовияса 90 процентта пяшкодьсы рынкать вешфксонц», - мярьгсь Дмитрий Чернышенко.

«Тейнек пяк эряви виияфнемс оптиковолоконнай кластерть и латцемс производствань пяшксе цикла, атказакшнемок омба масторонь преформатнень эзда. Ладямок производства Саранскяйса, тейнек ули кода касфтомс ноляви продукциять объёмонзон, тяка пингть аф ащемок омба масторонь поставщикнень эзда. Мольфтевихть партнёронь сотксонь ладямать колга корхнемат связень инь оцю операторхнень мархта. Мордовиянь оптическяй волокнать талекац Россиянь рынкаса эряви фалу касфнемс», - мярьгсь Артём Здунов.