Республикать столицаса етай Образовательнай организациятнень эса питаниять цебярьгофнеманц мархта сотф кизефкснень коряс II Всероссийскяй конференциясь. Мероприятиять рамкаса Мордовэкспоцентраса инжихненди пуроптфоль тястонь велень хозяйствань производительхнень продукцияснон выставкац. Шобдава сонь ванозе странань просвещениянь министрть васенце заместителец Дмитрий Глушко. Оцю промышленнай предприятиятнень, а стане жа фермерхнень продукциясна келиста ноляви тевс школьнай завтракнень и обеттнень анокламста. Сембе синь етнихть качествати и безопасностти соответствиять лангс кеме контроль. Тянди шарфневи башка оцю мяль Мордовиянь образовательнай организациятнень эса пси ярхцамбялень анокламста. Школьнай питаниянь организаторхне – кейтеринговай компаниясь, а ламоц райоттнень эса тя синць школатне – заказакшнихть производительхненди продукция. Дмитрий Глушко шарфтсь мяль анок полуфабрикаттненди, конатнень ули кода нолямс тевс аф аньцек минь республикасонк, но и российскяй лия региоттнень эса.
«Тейнек эряви шарьхкотькшнемс, мезе эрь шабась странань эрь регионца сивонди завтраконди или обедонди, - китькстазе Дмитрий Глушко. – Сяс эряви цебярьгофнемс питаниянь системать образовательнай организациятнень эса, тянкса минь етафнесаськ тя конференциять. Мордовияса ули цебярь опыт сянь коряс, кода водендакшнемс местнай велень хозяйствань производительхнень и пищевой переработкань предприятиятнень школатненди анок продукциянь анокламати. Тяка пингть эрявихть пяшкотькшнемс питаниять организациянцты лихневи сембе вешфксне.
Мордовияв минь тердеськ и коллеганьконь лия региоттнень эзда, штоба синь няелезь, кода тя тиендеви тяса. Синь должетт шарьхкотькшнемс, што васенце задачась аф тоса, штоба панжемс фкя суперпредприятия, кона кармай заняф школьникнень андомаснон мархта, а ладямс тянкса марстонь работа паксяста, теплицаста, животноводческяй комплексста сявомок школати молемс».