Мордовиянь Правительствать Председателец Владимир Сушков видеоконференцсвязень режимса етафтсь совещания, коса корхтафоль коронавируснай инфекциять келемоманкса тевс сувафтф ограничениятнень пингста общественнай транспортть работанц колга. Участникне корхтасть, што эряви фалу тиендемс дезинфекция муниципальнай и частнай автобуснень, маршруткатнень и такситнень салонцнонды. Стане жа транспортса ардомста эрявихть нолямс тевс араламань средстватнень.
Совещанияса корхтафоль сянь колга, штоба сувафтомс тевс ардоманкса безналичнайста пандомать аф аньцек муниципальнай транспортса, но и частнай маршруткатнень эса. «Бесконтактнайста пандомась инь удобнай и аф пелькс методсь коронавируснай инфекциять келемомста», - мярьгсь премьер-министрсь. Владимир Сушков макссь поручения тиемс условият сянкса, штоба маластонь пингть ни улель кода пандомс безналичнайста маршрутнай такситнень и внутрирегиональнай автобуснень эса.