Саранскяйста Виталий и Ольга Трубенкофне касфтыхть 10 шабат. Сембода оцюти 18 киза, инь ёмлати – 2 кизонят. Ольга казьф III и I степенень лама идень тядянь Почетнай дипломса. «Родительская слава» орденонь медальхнень теест май ковть песта торжественнай обстановксаса максозень ПФО-са Россиянь Президентть полномочнай представителец Игорь Комаров.
Шабань араламань Междунарорднай шиня Трубенкофне тертьфтольхть Мордовиянь Оцюнять Артём Здуновонь лама идень семьятнень мархта васедемазонза.
Пшкядемок Россиянь Президентти, Ольга Трубенкова китькстазе лама идень семьятненди сонь внимательнайста малаткшнеманц: «Мяленьке спасибамс Тейть сянкса, мес Тон лезнять ванфнемс государствасонк семьянь питнешитнень».
Сон стане жа отмечазе, што лама идень родительхнень лангс прашенды лама заботада, и улель справедлива, кда ряцок лама идень тядятнень мархта пингта инголе тумс пенсияс улель кода лама идень илятнендивок. Сонь мирдец азозе, што семьясост старандави тонафтомс иттнень цебярьс, виияфнемс синь сембе ширде, тяконь лувксса трудть вельде. Виталий Трубенков азсь мяль козякофтомс школатнень эса трудонь кабинеттнень специальнай оборудованияса, штоба тонафнемс школьникнень шуфтста керсема.
Государствань Оцюнясь кирдезе тя инициативатнень ширеснон, отмечамок, што максы поручения лац-ряц арьсемс синь.
Васедемаса Владимир Путин пачфтсь шаба мархта семьятнень ширеснон кирдеманкса од мератнень колга. Тяфта, льготнай ипотекань программась лама идень семьятненди кувалгофтови 2023 кизоть самс. Кода отмечазе государствань оцюнясь, арьсекшневи серьёзнайста одкстоптомс и келептемс «О мерах по социальной поддержке многодетных семей» указонц положениянц. Арьсекшневи сувафтомс тевс 200 тёжянь цалковай питнес пандома «Родительская слава» орденонь медальть максомста, а сонцень орденть максомста 100 тёжянь цалковайть вастс, кода ульсь тяда инголе, макссемс 500 тёжянь цалковай.
«А ся тядятненди, конатненди максови «Тядя-героиня» почётнай званиясь, фкя пингста пандомс миллион цалковай», - поладозе Президентсь.