20 апрельста Мордовиянь Технопаркса етась пресс-конференция, кона лемтьфоль «Моя Мордовия» республиканскяй кадровай проектть заявочнай кампаниянцты итогонь тиемати. Эсонза примасть участия: Мордовия Республикань Оцюнять аф лама пингс тевонзон тиендисна Артём Здунов, проектть Наблюдательнай советонц председателец Наталья Долматова, Мордовия Республикань правительствать эзда РФ-нь Федеральнай Собраниянь Федерациянь Советть членоц, проектонь Наблюдательнай советть членоц Сергей Кисляк, проектонь оценочнай блокть вятиец Дмитрий Лисицын.
«Моя Мордовия» проектть васенце этапонц итогонзон колга корхтамста Артём Здунов азозе, што регистрировандаф 6 047 участник. Сон шарфтсь мяль сянди, што проектть эса участвондайхть аф аньцек Мордовиянь, но и лия региононь и нльне омба масторонь эряйхне. Участникнень процентсна, конат эряйхть Мордовияса или кода-бди сотнефт сонь мархтонза, пяк оцю – пцтай 90 процент, но улихть и стамот, кинь республикать мархта мезевок аф сотнесыне, «но синь няихть тяса «касомань васта», возможность няфтемс эсь потенциалонц, сатомс сатфкст». Здунов азозе: «Сембоц проектонь участникне няфтихть Мордовиянь 156 населеннай пункт, Россиянь 56 регион и омба масторонь 5 государстват».
Проектонь Наблюдательнай советть председателец Наталья Долматова шарфтсь мяль сянди, што участникне аф фкя лацоннет кизос и уликс опытть коряс: «Тя корхтай сянь колга, што од участникненди ули кода тонафнемс опытнай коллегаснон эзда, а опытнайхнень – содамс, кодама решеният азонкшни управленецонь од поколениясь. Арьсян, мяльса-арьсемаса и опытса тяфтама полафтомась лезды республикать виияфнемаса».
Башка сон отмечазе аватнень оцю активностьснон, китькстамок, што «Моя Мордовия» проектса лия региоттнень эса сонь лацонза проекттнень коряс сембода оцю аватнень-участницатнень процентсна – 45,1 процент: «Тейне-арам, тя пара. Улихть сферат, конатнень эса инь цебярь руководителькс фалу ульсть аватне, кепотьксонди, здравоохраненияса, образованияса и стак тов».
Сергей Кисляк эсь выступлениясонза лятфтазе, што тяниень пингть Мордовиять, целайнек Россиять и минь обществаньконь инголе ащихть кизефкст и вызофт, конат «сотнефт аф фкя лацонь сфератнень мархта»: «Тяфтама аф фкя лацонь кизефкснень решандаманкса васендакиге эрявихть ломатть – тяниень пингонь грамотнай специалистт, конатненди вийс коре аф аньцек азомс решеният, но и сувафтомс синь тевс». Сон азсь надияма, што аськолксне, конатнень азсазь и етафтсазь эряфс проектонь участникне, максыхть лама положительнай эффект и лездыхть касфнемс регионть экономическяй стабильностенц, цебярьгофтомс эряфснон аф аньцек Саранскяень, но и марнек Мордовиянь эряйхнень».
Дмитрий Лисицын кошардозень участникнень «кода можна сяда ответственнайста малаткшнемс заданиятненди проектть сембе этапонзон пингста», лятфтамок, што эздост ащи регионть сай пингоц.
Лятфтасаськ, «Моя Мордовия» кадровай конкурссь ушедовсь 2021 кизонь 3 мартста, шумордамс сонь арьсекшневи июньцта. Участникне, конат лац етасазь отборочнай этапнень и лисихть финалти, сувафтовихть управленческяй кадрань региональнай резервати, а инь цебярьхне еткстост получайхть упрвлениянь разнай уровеньца работань колга предложения.