Панжемок торжественнай илать, Мордовиянь Оцюнясь поздравондазень сембе культурань и коень ванфтыхнень, театральнай деятельхнень, сюконясь лац тевснон тиендемаснон инкса.
«Тячи минь кельгозь макссетяма честь сятненди, кинь ули эсьлацонь миссияц и асушиц, - макссемс ломаттненди надияма, лездомс кемамс сай пингти, эсь Родинанцты, лездомс эрямс и покодемс мялень салайста, мора мархта. Вдь культурафтома аш кода! Тяфта ульсь и Великай Отечественнай войнань кизотнень – солдаттнен мольсть тюрема мора мархта. Морось ряцок мольсь странань эряйхнень мархта марса инь стака пингть минь Россияньконди-мастороньконди», - азозе Артём Здунов.
Цебярьста касы-виияй культурань сферась республикаса. Кота кизоста «Культура» нацпроектть видеса удалась пуроптомс отрасляв 1,3 млрд лама цалковай. Строяф и лац-ряц петьф 35 объект, нинге 38 учрежденияса одкстоптф материально-техническяй базась, одкстопневихть районнай и велень культурань куттне.
Тядде ушедсь од этапсь – «Культура» нацпроектть вастс сась «Семья» нацпроектсь.
Мордовиясь маряй кенярдема 7 профессиональнай, 11 народнай, кафта образцовай идень театра, эсьлацонь фестиваль мархта.
«Кеняртьфти, мес театрав кармасть якама семьянек – тя няфнесы минь культуранай кодоньконь, касомать-вииямать, няфтьсы сянь, што минь культураньке ётай од поколенияти, - китькстазе республикань Оцюнясь. – Пяшксе залхт – гарантия, што культурась кармай эряма. Тя качествань знак!».
Тяшкстафоль Россиянь Президентть эрявикс эняльдемац тяддень кизоста нолдамс кунара учсеф «Земский работник культуры» программать, а стане жа поколениять полафтомац республикать культурнай тналсонза.
Сай кизоть топоди 150 киза Степан Дмитриевич Эрьзянь шачема шистонза, кона тиезе содавиксокс шачема маторть культуранц. Юбилейнай илатне ётайхть оцю уровеньца, тиемок тя событиять няевиксокс Россиять культурнай эряфсонза.
Республикань руководительсь башка тяшкстазе мялень салай культурнай инициативатнень ёткста «#КультураZаПобеду!» проектть, коса эрязста примсихть участия государственнай и муниципальнай культурнай сембе учреждениятне. Ламотне арнихть специальнай военнай операциянь васттненди, штоба кирдемс боецнень боевой ваймоснон, анокласть патриотическяй концертт и выставкат, примасть участия гуманитарнай сталмонь кочкамаса.
«Сюконятама теенть боецненди лезксонь максоманкса, катк теенть мрдай кафтонь крда. Цёратне фалу кармайхть мяляфтома, што колгаст аф юкснихть – теест тя пяк эряви!» - тяшкстазе Артём Здунов.
Мордовиянь Оцюнясь сюконясь эрьти, кие путозе эряфонц республикать культурнай потенциалонц касфтомаса, патриотизмать кемокстамаса кунардонь духовно-нравственнай питнишить и нацинальнай койхнень, ванфтомаса и одкстоптомаса.
«Тинь нолятада вийхть и казендьсасть синь ломаттненди! Сон мрдай теенть кафтонь крда!» - мярьгсь Мордовиянь Оцюнясь.
Церемониять пингста культурань покодихненди максфтольхть оцю казнет.
И.М. Яушевонь лемса оперань и балетонь театрать директороц Владимир Шарапов, конанди максф Мордовия Республикань Народнай артистонь лем, азозе: «Культурась – тя аф услугань сфера, тя эряма васта, коса минь мархтонт кастама, вииятама, тиефтяма кода нация, кода народ».
Н.П. Огарёвонь лемса МГУ-нь культурань и искусствань Дворецть директороц Наталья Атитанова, кона арась Мордовия Республикань искусствань заслуженнай деятелькс, азозе, што тя оцю честь и лятфнема сянь колга, што лама нинге эряви тиемс республикать цебярьгофтоманцты
Мордовиянь культурнай сообществань ветераттненди казсть панчфт Мордовиянь Оцюнять эзда.
Мордовия Республикань Оцюнять пресс-службац