29 апрельста МР-нь Оцюнять аф лама пингс тевонзон тиендисна Артём Здунов примась участия «Учитель года Республики Мордовия 2021» конкурсти итогонь тиемань торжественнай церемонияса. Муниципальнай этапса примасть участия 170 педагогсь. Финалти лиссть 23 ломанць – тифтень эрь районцта и Саранск ошень округста. Кажнайсь эздост получась подарочнай сертификат Оцюнять тевонзон аф лама пингс тиендиснон эзда.
Финальнай республиканскяй этапсь етафтфоль кафта турса. Васенцеть итогонзон коряс – кочкавсть вете суперфиналисттне. Тяза сувасть 4№ Ковылкинскяй школань английскяй кялень тонафтысь Александра Данильченко, Рузаевкань 1№ гимназиянь рузонь кялень и литературань учительсь Наталья Матренина, Саранскяень 41№ школань физическяй культурань тонафтысь Сергей Нырков, Лямбирскяй райононь Берсеневскяй школань историянь и обществознаниянь учительсь Александр Смирнов, Ичалковскяй райононь Рождественскяй школань емла классонь тонафтысь Светлана Чекушкина. Теест максфтольхть диплопт и ярмаконь премият.
Конкурсонь участникнень приветствондамста Артём Здунов азозе, што пара няемс сценать лангста педагогт-алят. Профессияти синь мрдамасна корхтай сянь колга, што эвондакшнихть тонафтомань од методикат. «Сембода важнайсь, што афкуксонь учительти ули кода приметамс ученикть эса сай пингонь тяштть. Аф фкя лацонь олимпиадатнень эса Мордовиять сяськоманза кемокснесазь тянь. Шабатне, конат сай пингть сувсихть эряфти и арсихть афкуксонь ломанькс, эсь тевонь профессионалкс, - тя минь главнай гордостеньке и сяськоманьке. И тянкса минь азонттама сюкпря именна учительти», - мярьгсь региононь вятись.
Сяськить лемоц мекольце минутас кирдевсь секретса. Конвертть панжезе Артём Здунов. Сон и азозе, што Мордовия Республикань кизонь учителькс арась Наталья Матренина, Рузаевкань 1№ гимназиянь рузонь кялень и литературань учительсь. Сон пшкядсь залти спасибамань вал мархта и китькстазе, тяниень пингсь веши, штоба учительсь сонцьке фалу тонафнель, аньцек тяфта ули кода сатомс оцю сатфкст профессияса. «Минь няйсаськ, што шабатне пяк курокста полафнихть марса мирть мархта. Но мон кеман фкяти – сай пингсь учительть кядьса. Минь аноктама сембе полафтксненди,тяка пингть апак юкснек тонафтомань традиционнай методикатнень колгавок. Минь кельгсаськ шабатнень, Минь верондатама странаньконь сай пингонцты. Сюкпря тяшка оцю оценканкса», - мярьгсь конкурсонь сяськись.
Республикань Оцюнять аф лама пингс тевонзон тиендисна поздравляндазе Наталья Матренинать и арьсесь теенза достойнайста няфтемс Мордовиять всероссийскяй конкурсса.
Мордовия Республикань Оцюнять пресс-службац