28 октябрьста Мордовиянь Правительствать Председателец Владимир Сушков ванозе, кода мольфтеви социальнай ширде эрявикс объекттнень строямасна, конат эвондайхть национальнай проекттнень мяльса кирдезь.
Рузаевкаса строяви 108 вастонди идень сад. Сонь питнец – 100 миллионть малава цалковай. Железнодорожниконь ошса Владимир Сушков ванозе, кода мольфтеви А.В.Ухтомскяень лемса культурань центрать капитальнай ремонтоц. 2020 кизонди арьсеф работатнень васенце этапсна, мезенкса нолдаф 40 миллион цалковай. Педа-пес работатне улихть тифт 2021 кизоня «Культура» нацпроектть мяльса кирдезь.
Региональнай кабминонь премьер-министрсь ванозе Рузаевка ошть обходонц строяманц. Тячиень шити ацаф асфальт 7,5 вайгяльбень кувалмоса участкаса. Строительхне кемокснесазь ки крайть щебеньца. Тядде Рузаевкать обходонц строяманкса нолдаф 850 миллион цалковай.
Лямбирскяй райононь Аксенова велеса од школать строяманц мяльса кирдезь Владимир Сушков макссь поручения шумордамс вельхксть тиеманц-ладяманц и сяда курокстомс благоустройствать коряс работатнень.
Стане жа Правительствать Председателец ульсь Идень республиканскяй клиническяй больницять строяма вастсонза. Объектть эса работайхть 160 специалист, конат тяниень пингть строясазь ветеце этажень стенатнень, латцесазь инженернай сеттнень и пяшкотькшнесазь потма ширдень отделочнай работатнень.