Владимир Волков: «Ленинскяй райононь лац-ряц тиф паркса ошеряйхненди должен улемс аф аньцек пара, но и аф пелькс!»

Владимир Волков: «Ленинскяй райононь лац-ряц тиф паркса ошеряйхненди должен улемс аф аньцек пара, но и аф пелькс!»

Шуваланяста, 17 сентябрьста, Мордовиянь Оцюнясь Владимир Волков ванозе, кода мольфтеви Юго-Западса Идень республиканскяй больницянь од хирургическяй корпусть и Евсевьевонь лемса МГПУ-нь уендемань бассейнать строямасна, а стане жа макссь оценка ся полафтксненди, конат тиевсть Ленинскяй райононь Паркса «Формирование комфортной городской среды» проектть мяльса кирдезь петемдонза меле.

Идень республиканскяй больницять од хирургическяй корпусоц строяви «Здравоохранение» национальнай проектть мяльса кирдезь, сонь марстонь питнец – 2 миллиартта лама цалковай, пялесна ня средстватнень нолдавихть медицинскяй учреждениять мекольце покалениянь оборудованияса козякофтоманкса. Владимир Волков лувондсы тя объектть сембода важнайкс тяддень новостройкатнень еткста, сяс работатнень мольфтемаснон кирдьсыне личнай контроленц ала. Од корпусса кармай макссевома диагностическяй, хирургическяй и реанимационнай лезкс, тяконь лувксса одс шачихненди и педа-пес аф кантф иттненди. Тя кармай тяниень пингонь центра, кона максы республикати лисемс иттненди медицинскяй лезксонь максомань од уровеньц.

Тяниень пингть строительхне строязь ни кафта эташнень, колмоцеть арьсекшневи шумордамс ковть аделавомс. Мольфтевихть работат лангстонь и потмоширдень коммуникациятнень коряс, цокольнай этажса шумордафт отделочнай работатне. Сембоц объектть эса, тяконь лувксса вень сменаса, работайхть пцтай 230 ломань. Но, Мордовиянь Оцюнясь путсь подрядчикнень инголе задача касфтомс рабочайхнень лувксснон инь кржась 400 ломаньц. «Работатне эрявихть мольфтемс шинек-венек, фкя пингста сембе участкатнень эса. Тядденди сембе арьсефсь шумордама 15 декабрть самс», - китькстазе Владимир Волков. Тя эряви сянкса, штоба педа-пес нолдамс тевс средстватнень, конат максфт объектть строяманкса 2020 кизонди. Сянкса, штоба январьста ни кемокстамс федеральнай Минздравть мархта проектть эряфс етафтоманц поладоманц колга соглашения. 2021 кизоня тянкса нолдави нинге 1 миллиард цалковай.

Стане жа Мордовиянь Оцюнясь ульсь М.Е.Евсевьевонь лемса МГПУ-ть площадкаса, коса строяви уендемань од бассейна. Владимир Волковонь валонзон коряс, работатне тяса мольфтевихть саворста. Подрядчиксь сюцефоль сянкса, што площадкать эса заняф аф сатомшка лама рабочай, и тефне тяса мольфтевихть графикть эзда лядондозь. Тяда башка, сон кошардсь благоустроендамс маластонь территориять, мзярс погодась максси тиемс тянь.

Тяка шиня Владимир Волков марса Саранск ошень округонь оцюнять Петр Тултаевонь мархта ванозь, кода «Формирование комфортной городской среды» проектть мяльса кирдезь петьф-тиф Ленинскяй райононь парксь.  Пяшкотьф работатнень марстонь лувкссна – 41,5 миллион цалковай. Ули кода мярьгомс, што паркть тячи ули кода аф содамс!

Ваймосемань одкстоптф зонаса ладяфт налхксемань комплекст искусственнай вельхкс мархта, иденди препятствиянь полоса, волейболса и баскетболса налхксеманди универсальнай площадка, воркаутонди и скейтбордингса прянь занцеманкса площадкат. Тяса жа ладяфт нюряпт, ваймосеманди беседкат, аноклаф зона барбекюнди.

Паркса эвондасть цветочницат, эземнят, ладяфт светильникт, видеонаблюдения, тифт парковочнай од вастт Пионерская и Докучаева ульцятнень ширде. Ваймосемань зонать ваксса ладяфт кафта модульнай помещеният административно-хозяйственнай блокти и инвентарень прокатонкса. Пионерская ульцять ширде ащихть туалет, тяконь лувксса населениянь маломобильнай группатненди.

И хуш паркть торжественнайста панжемац кармай нинге пингта меле, ошеряйхне пуромкшнихть ни тяза ваймосема, спортса пряснон занцеманкса. Региононь вятись корхнесь Российскяй правовой академиянь студенттнень мархта, конат тя пингть ульсть тя маласа. Синь кизефтезь Мордовиянь Оцюнять меки дистанционнайста тонафнема етамать колга. Владимир Волков отвечась, што сонь койсонза, сокурсникнень и преподавательхнень мархта сельмоста сельмос няемась-корхнемась сяда мялень салай видеосвязть коряс. «Сяс сембонди тейнек эряви эсь пингстонза – сентябрьста – тиемс прививкат, штоба эвондаль иммунитетоньке и етафтомс тя сезонть самоизоляцияфтома и дистанционкафтома – карматама венемома тянди!» - азозе республикань Оцюнясь.

Эряви азомс, што одкстоптф паркса мяльс коре тев эстеест мушендыхть разнай кизонь ломаттне: иттне налхксемань площадкатнень эса, касы поколениясь – спортивнай площадкатнень эса, лама аллеятнень эзга якайда-шяяйда, ошеряйда, конат занцихть пря тренажерхнень мархта. Региононь и ошень вятихнень лемс азфтольхть спасибамань валхт.

Петр Тултаев азозе журналисттненди, што Ленинскяй райононь паркса ваймосихнень безопасностьснон и тяса правопорядкать обеспечендаманкса ладяви видеонаблюдения – 20 камера. «Разнай кизонь ломаттне должетт марямс пряснон одкстоптф паркса аф аньцек парста, но и аф пелезь!» - китькстазе Мордовиянь Оцюнясь Владимир Волков.

   

Мордовия Республикань Оцюнять пресс-службац