Пяденцяста, 18 августста, Мордовиянь Оцюнять аф оцю пингс тевонзон тиендисна Владимир Волков ульсь Инсарскяй и Кадошкинскяй райоттнень эса.
Региононь лидерсь, Инсарса улемстонза, ванозе «Ксенон» ООО-ть, коса содафтсь осветительнай оборудованиять производстванц мархта. Тяса нолневихть промышленнай, бытовой, школьнай, медицинскяй назначениянь светильникт, а стане жа ульцянь и теплицань валдопнемс лампат. Тядде заводса ушетф европейскяй дизайнонь светодиоднай светильникнень кочксемасна, конат нолневихть тевс общественнай васттнень и офиснень валдопнемаса.
Цехса республикань вятись корхнесь рабочайхнень мархта. Тяфта, автоматическяй металлообрабатывающай линиянь операторсь Сергей Милованцев азозе В.Д.Волковонди, што ниле кизода инголе мрдась Москуста Инсару, кодак аньцек содась производствать «эреклафтоманц» колга.
Эряви азомс, што светотехническяй предприятиясь нинге аф кунара ащесь срадома-каладома лангса, но республикань руководствась примась решения лездомс организацияти. Господдержкать вельде тяса ладяфоль производствась и ванфтфтольхть рабочай васттне. Тяни тяса работайхть райононь 350-да лама эряйсь. «Заводть модернизацияц поладови сяда товга. Арьсекшневи предприятиять техническяй перевооруженияц, светильниконь од виттнень нолнемасна», - азозе Владимир Волков.
Мордовиянь лидерсь стане жа китькстазе, што Инсарскяй районть виияфнемац поладови сяда товга. Вете кизоста тяса строяф 27 тежянь квадратнай метра эряма васта, 37 вайгяльбень кувалмоса кит, 20 вайгяльбеть маласа водопровод 9 велеса.
«Маластонь пингть арьсекшнетяма шумордамс «Сиял-Пятинское» обществаса 1000 траксонди молочнай комплексть строяманц, - отмечазе Владимир Волков. – Вете кизоста райононь предприятиятнень мархта нолдаф продукциять лувксоц кассь 1,5-крда и пачкодсь 2,7 миллиард цалковайс. Панчф 300 од рабочай васта. Тяконь лувксса 200 лама рабочай васта- «Сармич» сыровареннай заводса».
Инсарскяй районца строяви 1200 потяви траксонди молочнай комплекс и 100 тежянь тувонди свиноводческяй комплекс. Строявихть кит, тиеви ремонт уликсненди.
Нолневихть средстват образованиянь объекттнень материально-техническяй базаснон кемокснеманкса. Вете кизоста тиф ремонт райононь 10 школатненди. Шумордави ремонтсь 1№ Инсарскяй школаса, кона арси инь сире тонафнемань заведениякс. Мольфтевихть ремонтнай работат идень саттнень эса.
Тядде оцю работат тифтольхть благоустройствать коряс, мезсь сотфоль Инсарскяй районть 370 кизонь топодеманц праздновандаманц мархта.
«Минь кирдеськ граждаттнень мяльснон и нолдаме 1 миллион цалковай Инсарса «Старт» стадионтти ремонтонь тиеманкса. Стане жа нолдафт средстват Горькаень лемса ваймосемань паркть благоустройстванкса. Тя парксь панчфоль 18 векста и арси культуранй оцю козяшикс. Минь карматама лезнема паркть сяда товолдонь благоустройствасонза», - поладозе Владимир Волков.
Региононь вятить валонзон коряс, районть виияфнеманкса башка мяль шарфтома заработнай платать касфнеманцты, аф директорхнень зарплатаснон, а простой рабочайхнень.
Инсарскяй районца улемстонза Владимир Волков макссь ушеткс «Мордовскяй племенной центрать» нилеце очереденц строяманцты, кона строяви Засечная Слобода велеть маласа.
Кадошкинскяй районца Мордовиянь лидерсь ульсь «Мир цветов» акционернай обществаса, коса ванозе «Газогенирация» од проектть. Инвестициятнень лувкссна пачкодсь 150 миллион цалковайс. Тяса ладяф оборудования, конань вельде предприятияти ули кода эстеенза нолнемс электроэнергия эсь вешфксонзон пяшкотькшнеманкса. Экономиясь пачкотькшни 40 миллион цалковайс электроэнергиянкса пандомать кирьфтаманц вельде.
Лятфтасась, заводсь кизоньберьф касфни голландскяй технологияс коре розат. Тяниень пингть тяса работай 100 ломань. Панчфне мишендевихть Россиянь 35 лама регионц, а стане жа Белрусь Республикав.
Владимир Волков китькстазе республикань предприятиятнень сотрудникснон од семьяснонды лезнемать эрявиксшинц. Тянь, кле, пяк лац
тиендьсы «Мир цветов» предприятиять руководствац. Тяса 25 ломанць строязь эсь эряма вастснон, мезьса лездсь заводть ширде финансовай лезкссь.
«Мекольдень вете кизотнень тейнек лама удалась тиемс марса. Работаньке получси оцю оценка и доверия Россиянь Президентть Владимир Владимирович Путинонь эзда», - китькстазе Владимир Волков.
Вете кизоста Мордовиять виияфнеманкса нолдаф 260 миллиард цалковай, конат водендафтольхть завоттнень и ферматнень, эряма васттнень и идень саттнень, здравоохранениянь, культурань, спортонь объекттнень строяманкса, куд пирьфнень, идень и спортивнай площадкатнень благоустройстванкса.
Аньцек Кадошкинскяй районца тя вете кизотнень строяфоль 12 тежянь квадратнай метрада лама эряма васта, 12 вайгяльбень кувалмоса кит, тевс сувафтфт водопровотт и газопровотт.
Оцю мяль шарфневи здравоохранениянь и ЖКХ-нь систематнень одкстопнемаснонды. Меля ладяфоль водопровод Адажса, тиф реконструкция Кадошкинаса теплотрассати, подключандаф водонапорнай башнясь Пушкина велеса. Автономнай отопленияс етафтфт Латышовскяй и Адажень школатне. Тядде ладявихть нинге колма од котельнайхть Большеполянскяй, Глушковскяй и Паевскяй школатнень эса.
«Тяниень пингть решандакшневи кизефкссь Кадошкинаса водопроводть строяманц мархта. Колмоце этапть строяманкса эрявксты 16 миллион цалковай», - азозе Владимир Волков.