8 февральста Мордовия Республикань Оцюнясь Владимир Волков примась участия торжественнай собранияса, кона лемтьфоль Российскяй наукань шити и Русскяй техническяй обществати 150 кизонь топодемать праздновандаманцты.
«Мордовиясь сатсь оцю сатфкст инновационнай касомаса-вииякшнемаса. Республикаса пцтай шумордавсь комплекснай инновационнай инфраструктурать тиемац. Тячи минь панжеськ идень Технопаркть и «Молодежный» бизнес-инкубаторть. Тя кафта эрявикс пялькст региональнай инновационнай средаса», - азозе Владимир Волков.
Мордовиянь Оцюнять валонзон коряс, од объекттне арайхть научнай мялень-арьсемань афкуксонь кузенцякс. Од ломаттненди, школаста ушедомок ни, ули кода етафнемс эряфс инновационнай разработкаснон. Именна тяса работодательхненди ули кода приметамс сай пингонь сотрудникснон, а вусненди – сай пингонь студентснон.
«Оборудованиясь, конань мархта козякофтф идень технопарксь, пцтай фкя лацонне Н.П.Огаревонь лемса МГУ-нь, завоттнень, предприятиятнень научно-исследовательскяй лабораторияснон мархта. Тя инженеронь, ученаень серьезнай аноклама, ушедомок школаста ни. Тейнек тиема сембось, штоба асу од ломаттне аральхть васенцекс аф аньцек республикаса, но и Россияса», - отмечазе В.Д.Волков.
Инновационнай продукциять пяльксонц коряс Мордовиясь Россияса лидер. Промышленнай продукциять марстонь объемста тя 28 процентта лама. Республикась занцесыне васенце васттнень ламоц национальнай рейтинкнень эса. Кизоста региононьке экономикань Высшай школань инновационнай развитиянь рейтингса 18-це вастть эзда кеподсь 4-ти, арась лидеркс Россияса инновационнай активностень индексть коряс.
Республикать инновационнай касомасонза-вииямасонза башка васта макссеви Мордовиянь Технопаркти, кона мелянь кизоть итогонзон коряс арась сисемцекс странань технопаркнень еткста. Тячиень шити учреждениять улихть 92 компаниянза-резидентонза, коса работайхть 2000 малава ломань. Технопаркть продукциянь и услугань объемонза пачкотькшнихть 6 миллиард цалковайс.
МР-нь Оцюнясь азозень задачатнень, конат путневихть региононь руководствать и Технопаркть инголи.
«Эряви шумордамс сонь видесонза инновациянь проектированиянь Центрать и волоконнай оптикань Инжиниринговай центрать строямаснон. Отмечаса, што тейнек удалась пуроптомс марс уликс сембе научнай школатнень, конат заняфт спецволокнать мархта, а стане жа получамс сембе мирса содаф ученайхнень и омба масторонь партнерхнень лезксснон. Ня проекттнень цебярьста эряфс етафтомасна кемокстасы республикать конкурентоспособностенц», - мярьгсь Владимир Волков.
Научнай средать виияфнемаса башка васта занци научно-производственнай кластерхнень тиемасна. Меля «Волоконная оптика и оптоэлектроника» кластерсь арась сяськикс всероссийскяй конкурсса.
Республикань Правительствась максси сембе ширдень лезкс Н.П.Огаревонь лемса МГУ-ть и «Биохимик» заводть лекарствань од виттнень производстваснон коряс начно-производственнай центрать строяманц коряс марстонь проектснонды.
Респбликать лезксонц вельде вузсь етафни эряфс нинге фкя эсь лацонь проект кремниень карбидонь монокристалхнень касомаснон коряс. Тя максси возможность пуроптомс Мордовияса инновационнай полупроводниковай приборонь производствать коряс странаса инь оцю комплексть. Тяда башка, университетса вятевихть перспективнай исследованият материаловедениять, биотехнологиять, агроинженериять и энергосбережениять коряс.
Башка мяль Мордовияса шарфневи од ломанень наукать виияфнеманцты, технологическяй бизнести оттнень водендамаснонды, ушеткшнемок тя тевть школаста сявомок.
Республикаса лац работай асу шабанди республиканскяй Лицейсь, конац омбоце кизось мельцек занцесы омбоце вастть Россиянь 500 инь цебярь школатнень рейтингса. Кота кизоста Лицеень воспитанникне сявсть 133 медаль международнай олимпиадатнень эса. 45-сь эздост золотаннет. Результаттне сатневихть тяфтама направлениятнень коряс кода математикась, физикась, химиясь, астрономиясь, биологиясь.
«Минь старандатама видеста занцемс од ломаттнень инновационнай проекттнень эса, конат етафневихть эряфс республикаса. Студенттне активнайста водендакшневихть вузть видеса малай инновационннай предприятиятнень эса работати. Приметневи патенттнень лувксснон касомац, конат получафт студенттнень участияснон мархта», - азозеМР-нь Оцюнясь.
Университетса эряфс етафневи Российскяй научнай фондть грантоц, конань рамкаса исследовательхне работайхть Испаниянь профессорть Фернандо Бризонь руководстванц ала. Переменнай токонь электропривоттнень эса юмафкснень кирьфтамаснон коряс тя проектть эряфс етафнесы кемонь ломаньцта ащи командась, сисемсь конатнень эзда од ученайхть.
«Минь сяда товга карматама тиендемонза семботь асу од ломаттнень, перспективнай научнай мяльхнень-арьсематнень ширеснон кирнеманкса, передовой исследованиятнень и опытно-конструкторскяй работатнень етафнеманкса, - китькстазе Владимир Волков. – Ня платтнень эряфс етафтоманкса минь ули инь главнайсь – профессионализмась, трудовой кемошись, од мяльхть –арьсемат и специалисттнень ширде эсь тевснонды оцю кельгомась. Именна тя качествантень эзда ащи Мордовиять научно-техническяй прогрессоц, инголи молеманьке».
Мероприятиять пингста тифтольхть итокт «Инженер года Республики Мордовия – 2016» XII Республиканскяй конкурсти, кона етафневи Русскяй техническяй обществать мяленц коряс. Мордовияса сонь отделенияц ащи Саранскяень наукань и техникань кудса.
Конкурсонь участникнень разработкасна сувафневихть производствати, макссихть возможность атказакшнемс импортнай оборудованиять и комплектующайхнень эзда, каннихть экономическяй эффект.
Стане жа научнай сообществать профессиональнай праздник мархта поздравляндазь МР-нь Госсобраниять Председателец Владимир Чибиркин, Правительствать Председателенц заместителец – МР-нь промышленностень, наукань и од технологиянь министорсь Александр Седов.