Еткшиста, 11 февральста, Мордовиянь Оцюнясь Владимир Волков ванозень «Птицефабрика «Октябрьская» АО-ть уликс и строяви площадканзон. Предприятиять директоронц Иван Андинонь мархта корхтасть птицефабрикать 2016 кизонь работань итогонзон и сяда товолдонь планонзон квалма. Васедемаса участия примась Правительствать Председателенц васенце заместителец – Мордовия Ресубликань велень хозяйствань и продовольствиянь министрсь Владимир Сидоров.
Ванфоль бройлеронь касфнеманкса «Болотниково» од комплекссь, коса фкя пингста кирдеви 800 тежянь пря. Проектнай мощносттненди лисемста од площадкаса сиволень производствань объемтнень кизоста арьсекшневи пачфтемс 11 тежянь тоннас. Комплексть строямац, кона ащи 10 производственнай корпусста, ушетфоль мелянь май ковста, тячиень шити сембе синь кепотьфт ни, вятеви оцю технологиянь оборудованиять монтажец, арьсекшневи, што тяддеть омбоце кварталстонза комплекссь кармай работама сембе вийса. Мордовиянь Оцюнясь отмечазе, што од птицеводческяй площадкать строяманц коряс сембе работатнень пяшкотькшнесазь тястоконь подрядчикне. Важна, што велень хозяйствань од объектсь максы 83 дополнительнай рабочай васта.
Елховкаса Мордовиянь Оцюнясь ванозе лофцонь переработкать коряс цехть, коса мелянь ноябрь ковста ушедсь работама частста 3 тежятть сюлекат мощностьса ПЭТ кядьгос цельной лофцть и кисломолочнай продукциять кайсемаснон коряс од линиясь. Стане жа ванфоль 4 тежятть квадратнай метрань площадьса строяви инкубаторсь, конань проекттнай мощностец 46 миллион ал эрь шиня. Производственнай помещениятне строяфт ни, тяниень пингть мольфтевихть отделочнай работатне, мартста арьсекшеви ушедомс оцю технологиянь оборудованиять монтаженц.
«Октябрьская» агрофирмать нинге фкя пцтай педа-пес эряфс етафтф проектоц – кормотнень производстваснон коряс од цехсь, конань строяманкса нолдафоль 338 миллион цалковай инвестиция. Меколи кафта цехнень марстонь производительностьсна пачфтеви 650 тоннас сменаста.
Эряви отмечамс, што 2016 кизоня производствать келепнеманц коряс инвестиционнай проектти агрофирмать руководствац нолдась 1,2 миллиард цалковай. Владимир Волков, тиемок итокт няйфти, китькстазе: «Тяшка оцю инвестиционнай вложениятне макссихть возможность тиемс аськолкст инголи ламоц ширетнень эса. Васенцесь, ламода касфневихть производственнай показательхне, конатнень эзда ащи сембе республикань аграрийхнень работань результатсна – алонь, нармонень сиволень, лофцонь производствать коряс. Етай кизоть «Окябрьская» агрофирмась сатсь инь цебярь показательхть серонь урожайть коряс – 98, 8 тонна, тяконь лувксса кукурузада фкя гектарста получаф 103 центнер, яжаф – пцтай 50 тежянь тоннат. Омбоцесь: од технологиятне, тяниень пингонь производственнай линиятне макссихть возможность лихтемс переработчиконьконь работаснон од технологическяй уровеньц. И, колмоцесь, сембода важнайсь: од производственнай мощносттне – тя рабочай од вастт республикань райоттнень эряйснонды, пяк важнай задача, кона веши решандама».
Мордовия Республикань Оцюнять Пресс-службац