Мордовиянь Оцюнясь Владимир Волков етафтсь рабочай васедема внутренняй тевонь министрть Юрий Арсентьевонь мархта. Корхтамась мольфтевсь республикаса правопорядкать и общественнай безопасностть обеспечендамаснон колга.
Министрсь пачфтсь республикань Оцюняти правоохранительнай ведомствать 2016 кизоня работань итогонзон колга. Юрий Арсентьев отмечазе, што Мордовиясь ингольцекс лядонды Россиянь фкя инь сетьме и безопаснай регионкс. Преступностсь республикасонк сяда емла среднероссийскяй показательхнень коряс. Меля, Россиянь МВД-ть даннаензон коряс, занязе васенце вастть Российскяй Федерациянь инь емла преступность мархта субъекттнень еткста.
Тяка пингть, кода китькстазе Мордовиянь Оцюнясь, кой-кона ширетнень коряс работась эряви виияфнемс. Васендакиге корхтамась мольфтеви общественнай безопасностть обеспечендаманц и ульцянь преступностть кирьфтаманц колга. Владимир Волков путневи задачатнень еткста васенцекс азозе од ломаттнень еткса преступлениятнень профилактикаснон, участковайхнень и патрульно-постовой службань сотрудникнень работаснон цебярьгофнеманц, экономическяй и налоговай преступлениятнень ораткшнемаснон, граждаттнень антитеррористическяй аралафшиснон обеспечендаманц, тяконь лувксса 2018 кизонь футболть коряс миронь чемпионатти анокламста и етафтомстонза.
Мордовия Республикань Оцюнять Пресс-службац