«Евтан тенк седейшкавань поздоровт! Кеме шумбрачи тенк. Минь аштетяно каштанчисэ: минек республикасо улить истят геройть. Минь тынк лангс вантано! Весе земляктнень пельде карксамос сюконятано икеленк!» – мерсь Артём Здунов.
Михаил Семенович Борискиннэнь, зярдо ушодовсь войнась, ульнесть 14 иеть. Сон важодсь колхозсо, косо эзть сато важодемань кедть. 1944 иестэ саезель фронтов. Учебной частенть прядомадонзо мейле понгсь связень войскатнес. Воевась Западной фронтсонть – Венгриясо, косо топавтсь советской правительстванть европейской государстватнень руководительтнень марто свалшкань сюлмонть. Кудов, Мордовияв, велявтсь 1951 иестэ сержантокс. Войнадо мейле алтызе эсь прянть тиринь велесэ велень хозяйствасо важодемантень, сонензэ максозь «Заслуженный работник сельского хозяйства» почетонь лемесь.
Наталья Андреевна Мартынова ульнесь Атемарсо, зярдо ушодовсь войнась. Сон тонавтнесь 10-це классо. Армияв Наталья Андреевнань саизь чачома чистэнзэ, 1942 иень сундерьковонь 23-це чистэ. Радисткатнень курсатнень прядомадост мейле Наталья Андреевна служась Восточной фронтсо ПВО-нь войскатнесэ. 1945 иень якшамковсто сонзэ ютавтызь Западной фронтов. Войнань меельце читнестэ Наталья Андреевна ванстась военной сэдь Вильнюс ошсо. Изнямонть вастызе постонть кандомсто.
Хасянова Алевтина Александровна чачсь Ленинград ошсо, ламо эйкакшонь семиясо, косо кастовсть вете эйдеть. Зярдо ушодовсь войнась, Алевтина Александровнанень ульнесть ниле иеть. Сонзэ лелязо кулось вачочиденть лия эйкакштнень ульнесь дистрофия. 1942 иень ацамковсто Ладогань трокс баржасо эвакуациясь эзь кадово сынст мельс. Семиясь ускозель Мордовияв Отяжбуень енксов. Тесэ Алевтина Александровна прядызе школанть ды кармась важодеме Отяжбуе велесэ Культурань кудосонть. Весе эрямонзо алтызе культурно-просветительной тевдеемантень – сонзэ лавтовонзо удало Отяжбуень, Дубенкань ды Чаунзань енкстнэсэ важодемась. Алевтина Александровнань важодемань стажозо – 60 седе ламо иеть.
Сюконятано икеленк, вечкевикс ветерант!
Сюкпря Изнямонть кисэ!
Мордовия Республикань Прявтонь пресс-службась