Мордовиянь прявтошсо Изнямонь площадьсэнть ютавтовсь митинг-реквием, воинэнть-олякстомтыцянть ине тевензэ ледстямо састь малав 15 тежат ошонь эрицят ды инжеть. Почетонь таркатнень свалшкань коенть коряс саизь ветерантнэ. Кенярксчинтень истя жо тердезельть СВО-нь участниктне ды сынст семиятне.
Республикань руководителесь евтызе Панжиковонь 9-це чинть минек масторонь прявт кенярксчикс. «Течи – покш, иневанькс чи, конась минек ютксто эрьванть седейсэ. Неть читнестэ минь лиякс марятано минек роднянь-раськень сюлмотнень, течи минь – вейке покш семия. Изнямонь Чись вейсэнди весе поколениятнень, конат ванстыть тетятнеде, покштятнеде ледстнематнень, сынь ванстызь Россиянь олячинть, лоткавтызь минек историясо сехте покш ятонть. Вечкевикс ветерант! Сюконятано икеленк! Ризксэс, масторлангось, конась олякстомтозь фашизманть эйстэ, эзизе чарькоде кежей уроконть. Ламот мастортнэ бажить одс сермадомс видечинть, арсемс од геройть, кекшемс эсь историянь мельс а туиця лопатнень. Ансяк минь а манявтано! Те историясь сермадозь минек покштятнень ды тетятнень верьсэст. Секскак ней сынст нуцькатне одс стясть Тиринь масторонть ванстомо. Минь бороцятано историянь видечинть кисэ, минек питнейчитнень кисэ, покштятнень-бабатнень ледстнемаст кисэ, минек масторонь вандынь чинть кисэ. Весе рузонь масторлангонть кисэ. Зярдояк эште Ине Отечественной войнань иетнестэ саезь фашизмась эзизе кепедекшнэ прянзо истя панжадосто. Россиянь неень шкань историясонть эште зярдояк минь эзинек ульне истят виевть ды вейсэндязь. Минек вейке масторонок, вейке Президентэнек ды Изнямонок – вейке весень лангс! Минь кочкинек эсь кинть. Кемтяно вандынь чинтень. Эскелятано вейке командасо, вейке стройсэ, топавтано минек Верховной главнокомандующеень приказонть. Кода сестэяк, васоло ниленьгеменце иетнестэ, ней геройтнень шкась. Доброволецтнэ одс молить фронтов. Минь сынст вадрясто содасынек – те минек ялгатне, ве классо тонавтницятне, мартонок важодицятне, малавикс ломантне. Ильтяно сынст вейсэ ды вейсэ вастано героекс – лиясто, ризксэс, куломадост мейле. Течи минек марто сеттнень малавиксэст, кинь минь емавтынек. Свалшкань ледстнема минек геройтненень ды карксамос сюконятано сеттнень икелев, кие сынст тринзе-кастынзе. Те минек воинтнэ, конатнень кувалма минь аштетяно каштанчисэ, конатнень кирди весе Мордовиясь, весе минек покш масторось. Эрьва кодамо иень ды профессиянь кементь тежат ломантне, минек бизнесэсь свалшкане пурныть лезкс передовоенть туртов. Минек врачтнэ, правань ванстомань органтнэ, госслужащейтне, строительтне, священнослужительтне свалшкане ардтнить сеть регионтнэс, косо ней стака оперативной обстановкась».
Мордовиянь Прявтось тешкстызе: алкуксонь геройтне, алкуксонь изницятне свалшкане минек марто, минек седейтнесэ.
«Сынь кода ангелт, специальной военной операциянь таркатнесэ боецтнэнь лавтовост удало. А эште сынь – «А кулыця полкссонть». Монь туртов покш честь пачтямс эстафетанть минек од ломантненень – «Изнямонь Волонтёртнэнень», «Васенцетнень Движениянтень», вешнемань отрядтнэнь боецтнэнень, кадеттнэнень, казактненень, юнармейцтнэнень, весе цератненень ды тейтерьтненень, конат течи те площадьсэнть. Самай тыненк, вечкевикс од ломанть, эряви ванстомс Ине Изнямодо видечинть. Покштятне макссть тенек сэтьме масторланго ды минь ванстасынек минек масторонть куш-кодат тандавкстнэде. Секскак кеман, тынк ютксто эрьванть туртов, тынк нуцькатнень туртов панжиковонь 9-це чись свал карми прявт кенярксчикс. Слава народонтень-изницянтень!» – мерсь Артём Здунов.
Торжественной митингсэнть ютавтовсь каземань церемониясь. Россиянь Федерациянь Президентэнть Указонзо коряс Отечествань ванстоманть ды Россиянь Федерациянь государственной мельтнень-ванновтнень ванстоманть пингстэ боевой тевдеематнесэ невтезь отваганть, эсь прянь а ванстоманть ды мужестванть кисэ Жуковонь медальсэ казезь Николай Тазин - Зубова Полянань енкссто специальной военной операциянь участникесь.
Изнямонь кенярксчинть кувалма митингень участниктненень поздоровт истя жо евтась специальной военной операциянь участникесь Сергей Шаев.
«Изнямонь Чись – монь эрямосо прявт кенярксчи. Те сехте покш чи Россиянь эрьва эрицянть туртов. Минек покштятнень подвигест алкуксонь невтевкс монь туртов ды Отечествань течинь весе ванстыцятнень туртов. Передовойсэ улемстэ, мон ды монень кемевтезь боецтнэ эрьва минутасто чарькодтяно: ванстано минек ине масторонь суверенитетэнть. Секс мекс минек туртов Отечествась – те минек аватне, нитне, эйкакштне, кинь сэтьме удоманть минь карматано ванстомо се шкас, зярс чавить минек седейтне. Эрьва минутасто минь марятано минек малавикстнэнь кирдемаст, секскак честь ды достоинства марто топавтано путозь весе тевтнень. Лавтовтовдо лавтовс монь марто вейсэ Мордовия Республикасто боецтнэ. Виевть, отважнойть, а пелицят. Ансяк тосо чарькодят цератнень ютксо ялгаксчинь, воинской братствань, койтнень-кирдатнень, питнейчитнень ды православной кемемань алкуксонь смустенть. Минь, Россиянь солдаттнэ, алтатано: ятось карми яжазь, изнямось карми минек», – тешкстызе сон.
Ялгань средней школань тонавтницясь Анастасия Пахомова, специальной военной операциянь участникень тейтересь, мерсь: «Мон ды монь семиям покш сюкпрянь вал марто ледстнетяно весень, кие воевась сэтьмечинть ды олячинть кисэ – Ине Отечественной войнань ветерантнэнь. Сынст ютксо монь покштям Беленков Илья Михайлович, сон воевась Ленинградской фронтсонть 1941-1942 иетнестэ ды чавовсь тюремасо. Ризксэс, минек семиясь те шкас а содасы минек покштянь калмамо тарканть. Течи изницятнень поколениясь полады минек ине покштятнень боевой славаст специальной военной операциянь фронтнэсэ. Истят ломантнень ютксто вейкесь – монь тетям Пахомов Максим Петрович, сон апак пеле вансты Луганской ды Донецкой народной республикатнень. Сон тусь войнав 2022 иень ожоковонь 5-це чистэ. Минек семиясь пек мелявты тетянь кисэ, ансяк кирди сонзэ меленть, секс мекс минь чарькодтяно, кодамо питней эрьванть путовксозо минек вейсэнь изнямонтень. Монь тетям рядовой, монь туртов жо сон алкуксонь герой, мон аштян каштанчисэ сонзэ кувалма. Мон ды мартон тонавтницятне специальной военной операциянь участниктнень кирдемаст туртов свалшкане примить участия «Письмо солдату» акциясонть. Тейтяно окопонь штатолт ды кодатано кекшемань алтымат. Мон арсян, те минек иневанькс тевесь – лездамс малавикстнэнень истямо стака шкастонть. Кенярксчи марто, вечкевикс ветерант ды минек ошонь эрицят!»
Ине Отечественной войнань иетнестэ фронтов тусть Мордовиянь 246 тежат церат ды тейтерьть. Эрьвась омбоцесь эзь велявто. Ине Отечественной войнасо маштовозь воинтнэнь кеврунгонтень путозельть цецят. Маштовозетнень ледстизь чатьмонемань минутасо.
Митингенть прядовомадо мейле Изнямонь площадьсэнть ютавтовсь парад, сон алтазель Ине Изнямонь 79-це иетненень. Торжественной маршсо ютасть военнослужащейтнень, МЧС-нь ды Росгвардиянь сотрудниктнень, кадеттнэнь ды юнармеецтнэнь расчеттнэ. Колоннанть песэ парадонь сехте од участниктне – ошонь эйдень кужотнес якицятне.
Слава народонтень-изницянтень!
Ине Изнямонь кенярксчи марто!
Мордовия Республикань Прявтонь пресс-службась