Политическяй и экономическяй коммуникациянь агентствась няфтезе Российскяй Федерациянь субъектонь оцюнятнень влиянияснон мартовскяй рейтингснон. Сонь результатонзон коряс Владимир Волков лядонды оцю влияния мархта губернаторхнень группасост, занямок 28 вастть.
Кода отмечазе АПЭК-ть генеральнай директороц Дмитрий Орлов, мартста эсь вастснон кемокстазь региононь вятихнень тевснон тиендисна, конатнень тя должностти азозень странань Президентсь февральста. Тяка пингть лафчемкшнихть ся губернаторхнень позициясна, конатнень регионца касонды социальнай напряженностсь и протестнай активностсь.
Вете лидерхнень еткса полафткст ашесть эвонда. Рейтингть вятьсы Москувонь мэрсь Сергей Собянин. Омбоце вастса Чеченскяй Республикань оцюнясь Рамзан Кадыров, колмоцеса – Татарстанонь оцюнясь Рустам Минниханов, нилецеса – Тюменскяй областень губернаторсь Владимир Якушев. Ветеце вастса стаки лядонды Краснодарскяй краень оцюнясь Вениамин Кондратьев.
АПЭК-ть исследованиянь методикац:
Экспертнай опроссь, конань коряс аноклаф рейтингсь, етафневи селкф анкетированиянь методть коряс. 2017 кизонь февральста эсонза примасть участия 26 экспертсь: политолокт, политтехнолокт, медиаэкспертт, журналистт.