26 мартста синь мархтост васетькшнесь Мордовиянь Оцюнясь Артём Здунов. Васедемаса стане жа примасть участия Мордовиянь правительствать Председателенц васенце полафтыец Галина Лотванова и республикань здравоохранениянь министрсь Олег Маркин.
«Сюкпря эрьти аф тёждя работанц инкса, цебярьста тевонц тиеманкса, профессиональнай шумонтенди верностенц инкса, - азозе республикань руководительсь. – Покодемантень пингста 7 тёжянь 300 пациент получасть медицинскяй лезкс, ётксост 1200 лама шаба. Тя оцюдонга-оцю тев!»
Васенцеда специализированнай медицинскяй лезксонь максома Каланчаку сашендсь врачсь акушер-гинекологсь. Хирург-врачсь кафта ковста ётафтсь 145 экстреннай и плановай операцияда.
Стане жа, Каланчакскяй ЦРБ-нь администрациять эняльксонц коряс, минь регионцтонк специалисттнень вийснон коре поладови эряйхненди квалифицированнай офтальмологическяй лезксонь максомась.
Тостонь эряйхне кенярдихть Мордовияста саф врачненди.
«Сюкпря, што кематада тейнек и ашеде атказа максомс медицинскяй лезкс Каланчакскяй райононь эряйхненди. И пациенттне, и тостонь врачне пяк кенярдихть, што минь теест лезттама. Карматада лездома и сяда тов», - азозе Ардатовскяй районнай больницянь главнай врачть полафтыец Ольга Чичайкина.
Мордовиянь Оцюнять мархта корхтамаса стане жа примасть участия Республиканскяй офтальмологическяй больницянь офтальмологсь Александр Клочков, №1 Идень поликлиникань педиатрсь Елена Фарченкова, Краснослободскяй районнай больницянь общай практикань врачсь Елена Артыкова, Темниковскяй районнай больницянь акушерсь-гинекологсь Олег Зырянов, 3№ Идень поликлиникань педиатрсь Анастасия Милюкова, С.В. Катковонь лемса Республиканскяй больницянь хирургсь Владимир Шалин, 2№ поликлиникань неврологсь Равиль Якупов.
Сембе докторхне ульсть казьфт Мордовия Республикань Оцюнять лемста Благодарностьса.
25 мартста эсь профессиональнай шумонц пандома Каланчакскяй райононь территорияса тевс кундась Мордовияста врачень од командась – тя терапевтсь, хирургсь, педиатрсь, неврологсь и ультразвуковой диагностикать коряс врачсь.
Мордовия Республикань Оцюнять пресс-службац