10 апрельста матчта мельдень пресс-конференцияса Мордовиянь сборнайть и «Амкал» любительскяй футбольнай клубть налхкисна и тренерсна тисть итокт налхкомати. Журналисттне макссть аф кржа кизефкс мордовскяй футболть сай пингонц колга.
Артём Здунов азозе, што аф ваномок погодать лангс, налхкомс теждяль, паксясь пяк цебярель. Лятфтасаськ, што матченьберьф мольсь пизем, а температурась ашезь кепсе 5 градуста вяри. Налхкихне налхксть кафта таймат, 45 минута эрьсь и сувафтсть ортатненди несколька пенальти. Мордовиянь Оцюнять аф лама пингс тевонзон тиендисна спасибась соперникненди и Мордовиянь сборнайти, а стане жа организаторхненди и тя спортивнай илань участникненди.
«Амкал» клубть пуроптыец Герман Попков азозе, што тяфтама уровенень стадионца тя сонь команданц васенце налхкомац. «Мяленьке азомс сюкпря Артём Алексеевиченди, мес максф возможность налхкомс стадионца, коса етасть футболть коряс миронь чемпионатть матченза. Тянь колга минь арьсекшнеме 3 кизот. Минь тихтяма пяк цебярь роликт тя матчста. Футболс сась лама болельщикта. А видеоть интернетса ванцазь нинге сядонга лама ломань», - мярьгсь блогерсь. Именна Саранскяйса ладяф рекорд тяфтама матчс пуромф ломаттнень лувксснон коряс – налхкомать ванома сашендсь 9610 ломань.
«Амкал» клубонь налхкихне стане жа спасибасть организаторхненди, мес максфоль возможность етафтомс матч фкя паксяса футболонь тяшттнень мархта. Мордовиянь сборнайть инкса налхксть «Спартакть» легенданза Егор Титов и Дмитрий Аленичев. Синь китькстазь налхкомать парста анокламанц. И мярьгсть, што ошть улихть сембе возможностенза профессиональнай футболть виияфнеманкса.
Мордовиянь Оцюнять аф лама пингс тевонзон тиендиснонды максф фкя кизефкссь самай сотфоль Мордовияса профессиональнай клубть эвондаманц мархта. «Сави лама работамс сянь коряс, што эреклафтомс футболть Мордовияса. Тянь мархта минь тяниень пингть заняфтама. Мон лувондса, што марнек республикась, эрь районць должен налхксемс футболса. Эряви етафнемс чемпионатт. Кда сембе улихть водендафт, эста футболське кармай мазы, а минь сембось лиси. Минь шарфттама башка мяль футболть виияфнеманцты», - азозе Артём Алексеевич.
Стане жа матчса и тяда мельдень пресс-конференцияса ульсь пляжнай футболть коряс Россиянь сборнайть главнай тренероц Михаил Лихачев. Сон мярьгсь, што Мордовияти ули кода получамс база спортонь тя видть виияфнеманкса. Мольфтевихть переговорхт командань пуроптомать колга.
Мордовия Республикань Оцюнять пресс-службац