12 апрельста Мордовия Республикань Оцюнять аф лама пингс тевонзон тиендисна Артём Здунов примась участия «Классные встречи» всероссийскяй проектть эса, конань етафтсы Школьниконь российскяй движениясь. 2019 кизоня сон арась пяльксокс «Образование» нацпроектти. «Классные встречи» проектть эса участниконзонды ули кода васетькшнемс содаф ломаттнень мархта и корхнемс сянь колга, мезсь таколфтсыне од ломаттнень.
Мордовиянь Оцюнять аф лама пингс тевонзон тиендисна азозе, што мекольдень кизотнень РДШ-сь курокста виияфневи регионца. Эряфс етафтф образовательнай и общественно значимай лама проект. «Тинь примсетяда участия лама съездса и форумса. Тинь лама проектонтт – тя шарфни эсь лангозонза мяль. Тинь эряфонте афкукс мялень салай, сембось эрекста комболдозь комболды! Тячи тейнек важна шарьхкодемс, кода минь карматама работама сяда тов Мордовияса. Эрьда корхтатама сай пингонь проекттнень колга. Но сембода главнайсь шарьхкодемс – мезьса тейнек ули кода лездомс и кода кирдемс Школьниконь российскяй движениять ширенц», - мярьгсь Артём Алексеевич.
Движениянь члеттне макссть республикань вятити аф фкя лацонь кизефкст. Фкясь эздост сотфоль Мордовиянь Оцюнять аф лама пингс тевонзон тиендиснон школьнай кизонзон мархта. Артём Здунов азозе, што одста примсесь участия общественнай работаса, вятезе пионерскяй «звездочкать». Фалу примсесь участия спортивнай пялькстомаса. Мордовиянь Оцюнять аф лама пингс тевонзон тиендисна макссь школьникненди совет обязательна мушендомс пинге физическяй культураса и спортса прянь занцеманкса: «Тя афкукс пуропни марс, командас коре ялгатне лядондыхть эряфоньберьф!»
Ульсть и стама кизефкст, конатнень мархта кепотьфтольхть оржа прябалат. Тяфта, Саранскяйса РДШ-ть улихть обособленнай помещениянза работаманди и мероприятиянь етафнеманди. Райоттнень эса, кода правила, тяфтамот аш. Тя кизефксть коряс работа кармай мольфтевома муниципалитеттнень вятиснон мархта. Стане жа Артём Алексеевич эняльдсь кирдемс сай пингонь проекттнень ширеснон. «Кой-коста эрявихть аф сяшкава оцю средстват, а коста и ефси эряви аньцек административнай лезкс, и проектсь нолдави тевс. Минь обязательна арьсетяма финансовай пяльксть колга. Шять, лезкс максови уликс гранттнень мяльса кирдезь», - мярьгсь Мордовиянь Оцюнять аф лама пингс тевонзон тиендисна.
Стане жа школьникне азондозь, што синь вятихть работа ламоц социальнай сетьтнень эса. Аньцек Tik-Tok аккаунтса Мордовиянь РДШ-сь кочкась миллионда лама просмотра. Васедемать шумордамста Артём Здунов участвондась тя площадкати клипонь съемкатнень эса.
Мордовия Республикань Оцюнять пресс-службац