Артём Здунов рабочай поездка мархта ульсь Старошайговскяй районца

Артём Здунов рабочай поездка мархта ульсь Старошайговскяй районца

Мордовиянь Оцюнясь Артём Здунов 20 июньцта рабочай поездка мархта ульсь Старошайговскяй районца.

Новотроицкое велеса панжевсь пекарнять од зданияц. Инвестиционнай проектсь, конань питнец 35 миллион цалковай, ётафтф эряфс «Новотроицкий» агрохолдингть мархта Мордовия Республикань предпринимательствань виияфнемань фондть ширень кирдеманц пингста. Предприятиять мощностенза тяни касфтовихть кафтонь-крда – 6 тоннат продукцияс суткати, панжевихть од рабочай вастт.
Предприятиясь ноляй эрь кодама хлебобулочнай и кондитерскяй изделият, продукцияц лац содаф республикасонк.

Мордовиянь Оцюнясь ванозе од производствать, корхнесь холдингонь руководительть Владимир Руженковонь мархта производственнай платтнень и велеть сяда товолдонь виияфнеманц колга.

Агрохолдингсь активнайста стройси эряма вастт велень специалисттненди. Республикань Оцюнясь сувсесь Ленинонь ульцяс, коса тяниень пингть строяви куд Новотроицкяй средняй школань математикань учительти Людмила Шатковати. Новотроицкяйса шачф-касф авась несколька киза покодсь Саранскяйса, но кизода тяда инголе мрдась эсь велезонза (агрохолдингсь надияфтсь максомс эряма васта), и аф лама пингта меле сембе семьясна сувай эряма од кудс. 10 кизода меле, кда Людмила сяда товга кармай работама велеса, кудса максови собственностезонза. Сембоц «Новотроицкий» агрохолдингсь строясь ни пцтай 60 куд эсь специалистонзонды.

Кода азозе райононь оцюнясь Геннадий Мухин, велень территориятнень виияфнемань программать мяльса кирдезь Новотрицкяйса несколька кизоста строяфоль лама социальнай объект: стадион, идень сад, социальнай центра, эряйхнень ули лац пандови работасна. Вели водендакшневихть грамотнай специалист, пуропневихть од семьят, шачендыхть шабат.

Республикань Оцюнясь, стадионть вакска ётамста, лоткась и корхнесь од футболисттнень мархта – паксять лангса мольсь налхкома Новотроицкяень и Мельцанань школьнай командатнень ёткса.

Стане жа республикань Оцюнясь ванозе Новотроицкяйса животноводческяй комплексть и ремонтнай мастерскойть.

А Сире Шайгавса панжевсь од поколениянь идень библиотека, коса оборудованиясь латцеф «Культура» национальнай проектть мяльса кирдезь. Тяни тя афкуксонь информационнай центра, кона отвечай тяниень пингонь сембе вешфксненди. Шабатне пара мяльса сашендыхть тяза, тяса тиф несколька функциональнай зона, ули интернет, мезть вельде панчсеви ки эрь кодама электроннай ресурсненди. Тяда башка, библиотечнай фондсь пяшкодевсь од и тяниень пингонь книгаса. Тя пяк цебярь площадка шабатненди ётка пингонь ётафтоманкса, коса ули кодаи морафтомс, и тиендемс презентацият, и нльне ванондомс телескопонь пачк планетатнень и космическяй объекттнень мельге.

«Шабатне, конат састь каникулас эсь атяснон-бабаснон шири, пяк кеняртькшнихть библиотеканьконди, синь тянь лаца нинге ашесть няенде», - азозь Мордовиянь Оцюняти идень библиотекань сотрудницатне.

Рабочай поездканц пингста Артём Здунов корхнесь райононь оцюнять Геннадий Мухинонь мархта территориять сяда товолдонь социально-экономическяй виияфнеманц коряс платтнень колга. Тяфта, республикань Оцюнясь сувсесь Сире Акшино вели, коса ульсь поэтть Николай Огарёвонь родовой именияц. Тя населённай пунктть козя историяц, теенза ули кода арамс республикань туристическяй маршрутокс, кда удалай ётафтомс эряфс барскяй усадьбать эреклафтоманц коряс проектть.

Мордовия Республикань Оцюнять пресс-службац