Фабрикань участникнень кочкаманкса Мордовияса ётафтфоль олимпиада, конань эса примасть участия 3,8 тёжяньда лама ломань марнек республикать келес.
Участникне, конат няфтсть инь цебярь результат, тертьфтольхть эсь тевснон ушедоманц коряс тонафнема, но наставникнень – региононь сатфксонь сатни предпринимательхнень руководстваснон ала.
«Предпринимательствань фабрикась» аф пелезь аськоляй Россиять эзга – 70 субъектсь ётафнесазь эряфс проектть. Мордовиясь – регион, кона поладсь проектти васенцетнень ёткса – приветствондазень участникнень Артём Здунов. – Выпускнойсь – тя аф аньцек мероприятият, улихть афкуксонь проект. Сембода главнайсь, што сембе тинь венептяда сатфксненди, мяленте получамс афкуксонь содамошит, венептяда сятненди, кинь синь улихть, и кие сатсь ни результатт».
Ётафтфоль бизнес-проекттнень презентациясна. Сембе салазь эксперттнень мяльснон, максфтольхть кизефкст, советт.
Сяськсь Н.П.Огарёвонь лемса МГУ-нь экономическяй факультетонь студенткать Дарья Винороковать бизнес-проектоц. Стирсь марса «СПП РМ» РОР-ть исполнительнай директоронц Алексей Захаровонь мархта азсь мяль тиемс университетть видеса цебярь васта кельгома тевса прянь занцеманкса - «Stretching Flight» растяжкань студия.
Призёркс стане жа арасть Софья Мурзина, кона занязе омбоце вастть и кона азсь мяль панжемс фотостудия пленочнай фотографиянь печать и сонь мархтонза работать коряс.
Колмоце вастть занязе индивидуальнай предпринимательсь Евгения Приказчиковась, кона шашфнесы инголи Мордовияса мянцеви кирпичень, доскань и мраморнай обоень тиемань мяльть. Игорь Губайдуллин китькстазе, што промышленностень виияфнемань региональнай фондсь лезды Евгениенди педа пес тиемс проектть финансовай моделенц.
Меколи Мордовиянь Оцюнясь Артём Здунов нинге весть кирдезе ширеснон няфтьф сембе проекттнень, китькстамок: «Кда тинь аф удалай тя проекттнень эряфс ётафтомаснон мархта, тясть ноля кядентень – тинь обязательна мутада стама проект, конань киц удалай, сяс мес тинь аф ащекшнетяда фкя вастса. Кеман, инголе ули сатфксонь сатни лама мяльда-арьсемада, а итокненди оценкань макссема минь карматама цифратнень мяльс сявозь: рабочай васттнень лувксснон и инновациятнень».
Мероприятиять мяльса кирдезь стане жа кемокстафоль сотрудничендамать колга соглашения Н.П.Огарёвонь лемса МГУ-ть и «Фабрика предпринимательства» ФРПБ-ть ёткса.
Мордовия Республикань Оцюнять пресс-службац