Мордовиянь Оцюнять аф лама пингс тевонзон тиендисна Артём Здунов 12 апрельста етафтсь васедема «Сколково» фондонь представительхнень мархта, коса корхтамась мольфтевсь инновационнай сфераса марстонь работать колга. Васедемаса примасть участия республикань Правительствать членонза и Технопаркть руководствац. Лятфтасаськ, 2020 кизонь октябрьста Мордовиянь Технопаркти максфоль «Сколково» фондть региональнай оператороц статуссь.
«Тейнек пяк важна виияфнемс сотрудничендамать фондть мархта – минь ули вешфксоньке кой-кона предприятиятнень и инновационнай инфраструктурать виияфнемаса, - азозе Мордовиянь Оцюнять аф лама пингс тевонзон тиендисна. – Сяс мес нинге аф семботь удалась нолдамс тевс. Мезсь-бди строяф – но нинге ашезь ушеда работама, тоза эряви путомс бизнес-вайме. Тя работаса надиятама тинь лезксонтень лангс, спасибатама инфраструктураньконь пяшкотькшнеманц коряс предложениянтень инкса».
«Сколково» фондть международнай и региональнай сотрудничендамать коряс вице-президентоц Юрий Сапрыкин азозень Мордовиянь Технопаркть колга эсь мялензон-арьсеманзон: «Тиф цебярь инфраструктура, конань оцю потенциалоц. Тя инфраструктурась эряви коммерциализировандамс. Технопарксь арась фондти региональнай операторкс, но пандемиять сюнеда сотрудничендамась виияфневи аф сяшкава отькорьста, кода эряволь. Минь шарьхкотькшнесаськ ни, кодама ширеса карматама вятема марстонь работа, тяконь лувксса минь няйхтяма оцю потенциал вузовскяй средать мархта кооперациять эса».
Башка китькстафоль, што тяни региоттнень эса «Сколково» фондть резидентонзон ули доступсна фондть ширенц кирдеманц коряс марнек системати, тяконь лувксса налоговай льготатненди, гранттненди, инвестициятнень водендамаснонды.
Мордовия Республикань Оцюнять пресс-службац