Торбеевскяй РДК-нь методистсь Юлия Швецова, кона эряй районнай центраса, азондсь Культурань кудть капремонтонц мольфтеманц колга.
«Райононь эряйхне аф весть пшкятькшнесть клубоньконь петеманц колга, и работатне ушедовсть. Мольфтемстост клубонь коллективть – эздонк 15 ломань, явфтомазь разнай площадкава.Ужяленди, тянкса ламоц тядятненди-алятненди арась стака вятнемс шабаснон кружокс и секцияс, тяни тяза сашендыхнень лувкссна няевиста кирсь… Артём Алексеевич, эняльттяма теенть лездомс виияфтомс ремонтнай работатнень», - мярьгсь сон Торбеевань сембе эряйхнень лемста.
Мордовиянь Оцюнясь мярьгсь, што районти тя социальнай объектть эрявиксшиц пяк оцю, согласиндамок Юлия Швецовать эняльдеманц мархта. МР-нь Правительствань Председательть заместителец Галина Лотванова азозе, што основной строительнай работада башка стане жа эряви петемс-мазоптомс маластонь территориясь, рамамс тяниень пингонь оборудования.
«Койс коре тяфтама оцю объекттнень эса, а тяса нинге водендафт «Культура» нацпроектть коряс федеральнай средстват, работатне явовихть кафта кизонди. Синь марстонь питнесна – 125 миллион цалковай. Карматама старандама пяшкодемс синь кода можна сяда нюрьхкяня пингста, апак учентт 2023 кизоть пенц», - мярьгсь Артём Здунов.
1№ Атяшевскяй идень садонь воспитательсь Татьяна Живаева пшкядсь эняльдема мархта Атяшева посёлкаса водоснабжениянь системать реконструкциянц коряс: «Посёлкань сембе эряйхнень пичефтьсы симома ведть качестванц мархта сотф кизефкссь. Минь содасаськ, што водоводть полафтоманц коряс работатне мольфтевихть. Мяленьке содамс: мзярда кудоньконди поступай цебярь качествань симома ведсь?».
Правительствань Председательть заместителец - МР-нь энергетикань и жилищно-коммунальнай хозяйствань министрсь Игорь Чадов азозе, што реконструкциясь мольфтеви «Чистая вода» нацпроектть рамкаса, работатне арьсефт 2022 и 2023 кизотненди.
«Кемокстаф контрактть марстонь суммац – 166 миллион цалковай. Минь кучеме пшкядема РФ-нь Минстрои эняльдема мархта кандомс финансированиять 2023 кизоть эзда 2022 кизоти. Арьсян, сонь ширец ули киртьф», - мярьгсь региононь Оцюнясь.
Тяда башка, Ковылкинскяй райононь эряйсь Татьяна Артемьева пшкядсь республикань руководительти Волгапино велень эряйхнень эняльдемаснон коряс петемс автомобильнай кить. Сон стане жа эняльдсь лездомс тястонь храмть маласта дренажнай системать работанц мархта прябалать машфтомаса.
Мордовиянь Оцюнясь кирдезе азф кизефкснень решандамаснон эрявиксшинц ширенц и макссь тянь коряс порученият МР-нь Правительствати.
Мордовия Республикань Оцюнять пресс-службац