13 апрельста Мордовияв рабочай поездка мархта сась ПФО-са Российскяй Федерациянь Президентть полномочнай представителец Игорь Комаров. Полпредсь примай участия Приволжскяй федеральнай округонь Российскяй Федерациянь субъекттнень государственнай властень законодательнай (представительнай) органцнон Ассоциацияснон заседанияса. Заседанияда инголе ульсь Игорь Комаровонь Мордовиянь Оцюнять аф лама пингс тевонзон тиендиснон Артём Здуновонь мархта рабочай васедемац. Корхтафоль регионть социально-экономическяй виияфнеманц колга.
Республикань вятись пачфтезе, што тяниень пингть мольфтеви оцю работа, кона сотф государственнай шумоть кирьфтаманц мархта.
«Минь работатама Россиянь Минфинть мархта, ули ни шарьхкодема, мезе карматама тиема, тянь коряс ульсь доклад странань Президентти. Тяни минь лисенттяма решениятненди, конат максыхть тейнек лац-ряц участвондамс нацпроекттнень эса, работатама и сянь коряс, штоба ограничениятне, конат сотфт республикать госшумонц мархта, улельхть лоткафтфт – тейнек тя важна», - азозе Артём Здунов.
«Минь кирнесаськ тя кизефксть решандаманц ширенц, сяс мес Мордовияса сембода стака ситуациясь округонь сембе региоттнень еткста, - азозе Игорь Комаров. – Надиян, што Минфинть и властень федеральнай оргаттнень мархта работась тя ширеса лезды республикать виияфнемаса».
Стане жа корхтамась мольфтевсь кочкаматненди анокламать колга. Лятфтасаськ, республикаса синь етафтовихть сембе уроветтнень эса, ушеткшнемок муниципальнай депутаттнень кочкамаснон эзда и шумордамок Мордовиянь Оцюнять кочкаманц мархта. Артём Здунов китькстазе, што властень оргаттнень и общественнай институттнень инголе ащи марстонь задача: обеспечендамс кочкаматнень объективностьснон и демократичностьснон.
Мордовия Республикань Оцюнять пресс-службац