Коллегиять пуромксоц ушедсь «Система» особай экономическяй зонать Саранск ошень округса и Лямбирскяй муниципальнай районца тиеманц коряс Соглашениянь сёрмадомаста. Особай экономическяй зонань тиемась – регионтти тя историческяй события, сон нолдаф эряфс Президентть, Российскяй Федерациянь Правительствать и Россиянь Минэкономразвитиять лезксснон вельде.
Коллегиять работасонза примасть участия Беларусь Республикань налокнень и кочкаматнень коряс Министрсь Сергей Наливайко, РФ-нь экономическяй развитиять коряс Министрть полафтыец Дмитрий Вахруков, Россиянь Минэкономразвитиянь региональнай политикань Департментть директороц Дмитрий Косткин. Сергей Наливайко тяшкстазе, што ётай кизоть Мордовиять и Република Беларусть ёткса товарооборотсь кассь кафксть, и азозе, што ялгаксшинь сотксне аньцек кемокставихть.
Итоговай доклад мархта коллегияса корхтась МР-нь торговлянь и предпринимательствань, экономикань Министрть тевонзон вятисна Иван Горин. Сон тяшкстазе, што ётай кизоть республикась няфтсь цебярь касома сембе няфтематнень коряс. Промышленнай производствань индекссь – 108 %, сельскяй хозяйствань продукциянь нолямась – 105 %, основной капиталти инвестициятне – 112 %. Республикаса появась особай экономическяй зона, келептьф «Рузаевка» инголи моли касфтомань-виияфтомань территориясь. «Инвесторхне аф пелихть тиемс путфкст Мордовияв», - азозе Иван Горин.
Республикань Оцюнясь тяшкстазе, што инвестклиматть, бизнесть мольфтеманц коряс условиянь цебярьгофтомань работатне эрявихть поладомс.
«Мордовияса лац сувафтф региональнай инвестиционнай стандартсь. Эряви келептемс инвестстандартонь механизмась и муниципальнай уровеньца», - мярьгсь Артём Здунов.
Мекольдень кизотнень републикаса ламода кассь предпринимательскяй секторсь, касыхть самозанятайхнень лувкссна. Тя трендсь эряви поладомс, тянкса эряви эрязста нолдамс тевс ёмла и средняй бизнесонь сембе кирдемань мератне, васенцекссь – региональнай фондтне (предпринимательствать кирдеманц коряс Фондсь и Гарантийнай фондсь).
Стане жа Мордовиянь Оцюнясь тяшкстазе регионъётконь и народъётконь соткснень, бизнес-миссиянь организациятнень эрявиксшиснон. Тядденди, кепотьксонди, арьсефт бизнес-миссият Китайса и Казахстанца. Россиянь Минэкономразвитиянь региональнай политикань Департаментть директороц Дмитрий Костик, корхтамок коллегияса, китькстазе: «Сюконямок региононь од командать работанцты Мордовиянь экономикась тись полаткст и кармась сяда тов касома-виияма».
Бизнес-сообществатнень и государственнай властень оргаттнень сотксснон колга азондсь Мордовиянь предпринимательхнень и промышленникнень Союзснон исполнительнай директороц Алексей Захаров.
«Спрутс» ООО-ть генеральнай директороц Александр Ширяев явсь эсь опытонц мархта «Тюштян» щямонь региональнай брендть тиеманц коряс. Инжиень васьфтема сферать касфтоманц-виияфтоманц колга азондсь Radisson Hotel-ть финансовай дирктороц Антон Русаков.
ДОМ.РФ-нь представительхне няфтезь аноклаф Темниковскяй райононь мастер-планть. Лятфтасаськ, странань Президентть мярьгоманц коряс мольфтеви работась тя терроториять сувафтоманц коряс «Арзамас-Дивеево-Саров» паломническяй кластерти. Мастер-планць, конань аноклазе ДОМ.РФ-сь, няфтьсыне марстонь принципнень и социально-экономическяй касфтоманц-виияфтоманц коряс направлениятнень, а стане жа районтть туристическяй ширенц 2035 кизоть самс. Мастер-планть анокламста ульсь тиф онлайн-платформа, коса райононь эряйхне кадондозь эсь мяльснон-арьсемаснон.
Стане жа ётафтфоль стратегическяй сессиянь серия экперттнень и Темникавонь эряйхнень мархта.
Мордовия Республикань Оцюнять пресс-службац