Панжезе конференциять университетонь васенце проректорсь, ректорть кочкаманц коряс комиссиять председателец Пётр Сенин. Пуромфне кемокстазь процедурать ётафтоманкса эрявикс сембе структуратнень. РФ-нь Аттестационнай комиссиять решениянц коряс, кочкаматненди аттестация ётасть кафта кандидаттне: Дмитрий Евгеньевич Глушко – ректорть тевонзон тиендисна и Александр Михайлович Давыдкин – научнай работать коряс проректорсь.
Дмитрий Глушко, конференцияса выступандамста, отмечазе, што Н.П.Огарёвонь лемса МГУ-ть пяк оцю потенциалоц. «Минь вузоньке должен улемс лездыкс регионть социально-экономическяй виияфнемаса. Минь сяда тов поладсаськ университетть интеллектуальнай капиталонц касфнеманц коряс работать, Мордовиянь и лия региононь предприятиятнень мархта кооперационнай соткснень виияфнемаснон, мировой уровенень кампусть тиеманц. Астама мяль марса Промышленниконь и предпринимателень Союзть региональнай отделениянц мархта пуроптомс Индустриальнай совет, кона лезды путнемс тяниень пингонь кизефкст регионть производственнай сферанц ширде и получсемс работаньконь эффективностенцты оценка кода кадрань анокламань центрань. Башка и важнай ширесь – «Профессионалитет» образовательнай программать эса участвондамась и, конешна, од ломаттнень мархта работамань тяниень пингонь форматне и метоттне, конат отвечайхть сембе вешфксненди. Мордовиянь Оцюнять Артём Здуновонь ширень кирдеманц пингста «Саранск Арена» универсальнай залса ули пуроптф тяниень пингонь од ломанень медиа-кластер. Тейнек важна касфнемс университетть статусонц, водендакшнемс студенттнень лувксс асу школьникт», - отмечазе Дмитрий Глушко.
ВУЗ-ть виияфнемань стратегическяй задачатнень колга стане жа азондсь научнай работать коряс проректорсь Александр Давыдкин. Конференциянь участникне кирдезь Дмитрий Глушконь ширенц, виияфнемань сонь концепциянц.
Мордовиянь Оцюнясь Артём Здунов кирдезе Дмитрий Глушконь ширенц, отмечамок образованиянь сфераса сонь оцюдонга оцю опытонц, тяконь лувксса федеральнай уровеньцовок. «Дмитрий Евгеньевич шарьхкотькшнесыне процесснень, конат тиендевихть регионца. Тя ломань, кона кемоста ащи модать лангса. Сон машты работама: путнема задачат и пяшкотькшнемост синь. ВУЗ-са работамста тонафнезе университетть структуранц, шарьхкодезень сембе хозяйственнай тефнень и содасы, кода аськолямс сяда тов», - китькстазе региононь руководительсь.
Республикань Оцюнясь спасибась работанкса Александр Давыдкинонди, кона няфтезе прянц «Монь Мордовиязе» кадровай конкурсса и сувась университетонь командати.
Вайгяльхнень ламошкаснон мархта университетонь ректоркс кочкафоль Дмитрий Глушко.
«Дмитрий Евгеньевич, Тонь козя опытце, кона эряви кода можна сяда келиста нолдамс тевс. Но, работати эряви путомс и марнек ваймось. Сембось, мезе пуроптф университетса, эряви эреклафтомс и виияфнемс, тяка пингть ванфтома коллективсь и сотрудникне», - пшкядсь Артём Здунов Н.П.Огарёвонь лемса МГУ-нь ректорти. Тяда башка, Мордовиянь Оцюнясь отмечазе, што ВУЗ-са эряви шарфтомс оцю мяль воспитандамань кизефксненди.
Мордовия Республикань Оцюнять пресс-службац