19 декабрьста Мордовия Республикань Оцюнясь В.Д.Волков примась участия котоце созывонь МР-нь Госсобраниять нилеце сессиясонза, конань пингста депутаттне кафта чтенияса примазь 2017 кизонди и 2018 и 2019 кизонь плановай пингти регионть бюджетонц.
Бюджетть проектоц водендаф финансовай системать петеманкса и государственнай политикань инь эрявикс задачатнень пяшкодеманкса, конатнень еткса республикань эряйхнень инголе социальнай обязательстватнень пяшкодемасна, государственнай услугатнень макссемаснон качестванц и эффективностенц касфнемасна, инфраструктурнай и экономическяй вииякшнемась, 2018 кизонь футболть коряс миронь чемпионатть етафтоманцты анокламась.
Задачатне сатовихть бюджетть доходнай пяльксонц вельде.
«2017 кизонди и 2018 и 2019 кизонь плановай пингти Мордовиять социально-экономическяй вииякшнеманц прогнозоц арси ушетксокс бюджетть доходнай пяльксонц пуроптоманцты, конань коряс 2017 кизоня учендови потребительскяй питнетнень касомасна 5,4 процентта, сяда товолдень кизотнень тя индекссь аф ламода кири, - азозе МР-нь финансонь министрть васенце заместителец Любовь Романенкова. – Заработнай платань фондсь касфтови 8 процентта и пачкоди 69,8 миллиард цалковайс, а средняй заработнай платась сай кизоть кармай 25 тежянь 945 цалковай».
Экономикать вииякшнеманц коряс прогнозть мяльс сявозь, организациятнень прибыльсна кармай 22,9 миллиард цалковай и сон эрь кизоня касы. Алкогольнай продукциянь производствань объемсь сай кизоть арьсекшневи пачфтемс 3 миллиотт 750 тежянь декалитрас, пивать – 15,5 миллион декалитрас кизоста.
Республиканскяй бюджетть доходнай пяльксоц 2017 кизоня прогнозс коре пачкоди 27 миллиард 886 миллион цалковайс, 2018 кизоня – 26 миллиард 909 миллион цалковайс, 2019 кизоня – 28 миллиард 138 миллион цалковайс.
Финансонь министрть васенце заместителенц валонзон коряс, эсь дохоттнень марстонь объемсост кирьфтаф федеральнай бюджетста финансированиять пяльксоц. Эсь дохоттнень эса дотациятнень пялькссна сай кизоть кармай 12,6 процент, тя кизоть тя показательсь пачкодсь 17,3 процентс, 2018 кизоня – 5,6 процентт, 2019 кизоня – 5 процентт.
Налоговай и аф налоговай дохоттнень лувкссна бюджетса 2017 кизоня прогнозс коре пачкоди 22 миллиард 184 миллион цалковайс. Основной источникокс кармайхть акцизатне – 33 процент, физическяй лицатнень доходснон лангс налогсь – 28 процент, организациятнень доходснон и организациятнень имуществаснон лангс налокне – 13 процентонь.
Корхтамок карьхцнень колга, синь 2017 кизонди арьсефт 30 миллиард 88 миллион цалковаень лувксса, 2018 кизоня – 27 миллиард 942 миллион цалковаень лувксса, 2019 кизоня – 30 миллиард 340 миллион цалковаень лувксса.
«2017 кизонди бюджетть проектса мяльс сявф 26 государственнай программатнень финансированиясна, мезенкса арьсекшневи карьхцямс 27 миллиард 445 миллион цалковай. Карьхцнень пялькссна, конат пуроптовихть государственнай программатнень рамкаса, пачкоди 91,2 процентс, - отмечазе Любовь Романенкова. – Социально-культурнай сферати арьсеф 18 миллиард 459 миллион цалковай или бюджетнай ассигнованиятнень сембе объемснон 62 процентоц».
Социальнай политикати нолдави 7,4 миллиард цалковай, тяка лувксса населениять социальнай ширде обеспечендаманцты – 5,3 миллиард цалковай. Региононь эряйхнень эрямань условияснон цебярьгофтоманкса арьсеф 718,9 миллион цалковай, тяка лувксса: 296,1 миллион цалковай од семьятнень, 78,7 миллион цалковай сирота иттнень и тядянь-алянь попеченияфтома лятф шабатнень эряма вастса обеспечендаманкса.
Образованиянь системати карьхцяви 6,9 миллиард цалковай или республиканскяй бюджетть карьхцензон 23 процентсна.
Здравоохранениянь отраслять финансированиянкса нолдави 2 миллиартт цалковай.
Республиканскяй собственностень объекттнень строяманкса бюджетть проектса арьсеф 1 миллиард 520 миллион цалковаень лувксса ассигнования. Шумордави Мордовскяй музейно-архивнай комплексть строямац, Государственнай драмтеатрать реконструкцияц, сяда тов поладови коммунальнай хозяйствань объекттнень строямасна, тяка лувкссот «Юбилейный» эрямань комплексть видеса кафта поликлиникатне.
2018 кизонь футболть коряс миронь чемпионатти анокламатненди и етафтоманцты бюджетть проектса арьсеф 1 миллиард 236 миллион цалковаень лувксса финансирования. Республиканскяй дорожнай фондсь пуроптф 2 миллиартт 99 миллион цалковаень лувксса. Мордовиянь велень хозяйствань сфераса мероприятиятнень етафтоманкса нолдави 1 миллиард 500 миллион цалковай.
Выступандамок депутаттнень инголе, Мордовиянь Оцюнясь китькстазе, што основной республиканскяй финансовай документсь аноклаф аф теждя экономическяй условиятнень пингста. Региононь Правительствать, предприятиянь вятихнень инголе путфоль задача касфтомс бюджетти дохоттнень лувксснон, мезсь сатови аньцек дополнительнай карьхцень апак киртть.
«2017 кизонди бюджетть проектоц арась сяда реалистичнайкс и козякс. Финансовай средстватне нолдавихть реальнай производстватнень эряфс етафтоманкса, сяс мес бюджетть пяшкодемац мольфтеви пяк стакаста. Республикань руководствати эряви педа-пес пяшкодемс региононь эряйхнень ингольде социальнай обязательстватнень. Пяшкодемс кочкайхнень наказснон. Тяда башка, сявондемат мяльс ся дохоттне, конат улихть тяниень пингть, и аф надиякшнемс сятненди, конат нинге ашет», - мярьгсь Владимир Волков.
Отмечафоль, што Федерациянь субъекттнень бюджетснонды федеральнай бюджетста трансферхнень лувомань од формать сувафтоманц мархта Мордовиясь аф получай 3,5 миллиард цалковай. Мордовиянь Оцюнясь Россиянь финансонь министрть Антон Силуановонь мархта васетькшнемстонза корхтась финансированиять аф сатнеманц квалма, сатфоль договаренность 2017 кизоня ярмаконь средстватнень касфтомаснон коряс.
«Тядде учендови промышленнай производствать касомац 7 процентта, промышленнай производствать индексоц кармай 100 процентта лама. Основной капиталти инвестициятнень поступамасна учендови 100 процентта лама. Велень хозяйствань отраслять касомац – 8 процент, - азозе МР-нь Оцюнясь. – Статистическяй даннайхнень мяльс сявозь, заработнай платась республикаса кассь 106,5 процентта, а инфляциянь уровенць тяка пингста кассь 105,4 процентта. Инфляциять кирнеманц и заработнай платать касфнеманц коряс целенаправленнай политикась, конань примсесы республикань руководствась, пяшкотькшневи. Правительствати сяда товга поладома тя задачатнень эряфс етафнемасна».
Шинь повесткаса нинге фкя кизефксокс арась 2016 кизонь республиканскяй бюджетти полафткснень сувафтомасна, конат сотфт федеральнай центраста межбюджетнай поступлениятнень касфтомаснон эрявиксшинц мархта.
Финансовай лезкссь касфтови 50 миллион цалковайда, конатнень эзда 45 миллион цалковайсь нолдави дорожнай хозяйствань сферати, 3,6 миллион цалковайсь – медицинскяй работникненди фкя пингонь пандоматненди и лиянди.
«Сувафтф полафтксне лездыхть касфтомс бюджетть доходнай пяльксонц 39 миллиард 618 миллион цалковайс, карьхцне пачкодихть 43 миллиард 339 миллион цалковайс. Бюджетть дефицитоц кири и пачкоди 3 миллиартт 720 миллион цалковайс», - азозе Любовь Романенкова.
Сессияса ванфтольхть и лия закононь проекттне, сембоц 15 кизефкс. Вятезе заседаниять МР-нь Государственнай Собраниять Председателец Владимир Чибиркин.