Республикань медицинскяй работникнень приветствондамста Мордовиянь Оцюнясь азозе, што аньцек здравоохранениянь республиканскяй системать вельде тячи ули кода ваномс фкя-фкянь шамас, конат апак кяшт маскаса.
«Медицинскяй работниконь шись – народнай ила! Аньцек Мордовияса мон шарьхкодина, што улихть ломатть, конатненди вийс коре путомс пильге лангс, пякафтомс, мзярда аш кода сярядемс. И тя волшебство! Но сон эвондакшни аф шава вастса: тя оцю труд и профессионализма», - мярьгсь Артём Здунов.
Сон китькстазе, што региононь здравоохранениянь сферась моли инголи. Ётай кизоть пачфоль несколька од медучреждения, кой-кона объекттненди тифоль реконструкция, мольфтеви работа первичнай звенань учреждениятнень петемаснон-тиемаснон коряс. Оцю работа мольфтеви сянкса, штоба регионца одкстоптоволь онкологиянь госпитальнай корпуссь и лия учреждениятне.
«Башка мялезе лоткамс кадратнень лангс. Татьяна Алексеевна Голикова азозе, што фкя инь цебярь медицинскяй кадратне – Мордовиясот. Минь специалистоньконди-медиконьконди ули вешфкс аф аньцек республикаса – тя и вузоньконь эса омба масторонь студенттнень оцю лувкссна», - мярьгсь региононь оцюнясь.
Башка благодарность азфоль отраслянь ветераттненди, а стане жа волонтёрхненди-медикненди, ламотнень конатнень эзда мяльсна работамс здравоохраненияса.
«Медицинась – тя призвания эряфоньберьфонди! Тя аф тёждя, но достойнай профессия,конанди фалу кармай путневома честь!» - мярьгсь Артём Здунов, максомок профессиянь представительхненди казнет.
Лука Крымскаень медальса, конань 2020 кизоня ладязе Россиянь Президентсь здравоохраненияса оцю сатфксонь сатнеманкса, казьф Комсомольскяй ЦРБ-нь врачсь-терапевтсь Николай Биряев, конань маштозь работаманц вельде ковиднай госпитальста пчкафста нолдафоль 212 пациентсь.
Лама киза совестьс коре работаманкса «Российскяй Федерациянь здравоохранениянь Заслуженнай работник» почётнай лемсь максф Дмитрий Якушевонди, кона 30 лама киза ульсь Саранскяень Скорай медицинскяй лезксонь станциянь руководителькс.
Российскяй Федерациянь Президентть Почётнай грамотасонза казьфт 4№ РБК-нь врачсь-анестезиологсь Сергей Гадеев, С.В.Катковонь лемса РБК-нь приёмнай отделениянь заведующайсь – врачсь-терапевтсь Елена Ларина. РФ-нь Президентть Благодарностец азф Ардатовскяй больницянь врачти-анестезиологти-реаниматологти Александр Мишинонди, Мордовскяй РЦКБ-нь родовой отделениянь заведующайти – врачти-акушерти-гинекологти Валерий Хаванскяенди, Ковылкинскяй ЦРБ-нь кордиологическяй отделениянь заведующайти – врачти-кардиологти Наталья Забродинати.
«Тя оцю казнесь коллективть, коса мон трудендан. Минь лац ладяф работаньке, лия госпитальхнень мархта фалу сотксонь кирдемась и республикань руководствать ширень кирдемац лездсть тейнек сяськомс ковидть», - эсь каршек валсонза отмечазе Наталья Забродина, арьсемок шумбраши сембе медикненди и синь мала ломаньцнонды.
Мордовиянь здравоохранениянь министрсь Олег Маркин спасибась коллеганзонды эсь прянь аф ужяльдезь работаманкса, профессияснонды вернайкс улеманкса: «Ломаттне надияфнесазь теенть сембода питнить – эсь и мала ломаньцнон шумбрашиснон. Тинь тиенттяда оцю тефт, лезнемок пациенттненди, кой-коста эвондафнемок пелькс эсь эряфонтенди».
Республикань Здравоохранениянь министрсь стане жа казезень медицинскяй работникнень идьснон рисункань конкурссост сяськихнень. Ня рисункатнень выставкаснон торжественнай мероприятият ушедомда инголе ванозе Артём Здунов.
Сяськикс арасть Мария Волкова – Саранскяень Шачфтома кудонь главнай врачть Лидия Ветчинкинать унокоц, Вероника Бирюкова, кинь тядяц – врач-инфекционист Ичалковскяй ЦРБ-са, а стане жа Ангелина и Ярослав Ремнефне, конатнень родительсна трудендайхть фельдшеркс Скорай медицинскяй лезксонь станцияса.
Торжественнай мероприятияса стане жа примась участия МР-нь Государственнай Собраниять Председателец Владимир Чибиркин.
Мордовия Республикань Оцюнять пресс-службац