25 ноябрьста Мордовия Республикань Оцюнясь Владимир Волков васетькшнесь Федеральнай дорожнай агентствать вятиенц Роман Старовойтонь мархта, кона сашендсь республикав рабочай поездка мархта. Кафта ширетне корхтасть 2017 кизонди автомобильнай китнень строямаснон и ремонтснон колга.
Росавтодоронь вятись макссь оцю оценка ся работати, кона тиф республикаса кинь инфраструктурать виияфнеманкса, тяка лувкссот и ся тефне, конат тифт 2018 кизонь футболть коряс миронь чемпионатти анокламатнень рамкаса.
«Минь нолясаськ тевс тяниень пингонь технологиятнень и материалхнень, штоба ки лангонь объекттне служальхть сяда ламос, а китнень ланга арнемась улель безопаснайкс», - китькстазе Мордовиянь Оцюнясь.
Тяниень пингть Мордовияса мольфтевихть кинь строямать коряс оцю тефт. Республикась пцтай педа-пес одкстопнесы ки лангонь инфраструктурать. И кинь строямань пцтай сембе тефне тяфта или стане сотф 2018 кизоти анокламатнень мархта.
Фкя инь главнай кизефксокс ульсь ки лангонь эрявикс проектть – Саранскяйть восточнай ширде шароманц кись, кона сотнесы Саранск – Ульяновск кить, и Николаевка и Ялга поселкатнень маласта Саранск – Рузаевка китнень строямаснон аделамац. Кить кувалмоц 16 вайгяльбе. Строямац ушетфоль 2013 кизоня, шумордамс арьсекшневи 2017 кизонь декабрти. Мазоптомбялькс Восточнай обходти арась эсь лацонь развязкась. Миронь чемпионатть пингста эзганза кармайхть пачкотькшнема Пензенскяй облостьста сайхне, а стане жа Саранскяень аэропортста «Мордовия Арена» стадионть шири.
Тяниень пингть лядсь шумордамс строямать Восточнай обходть аф оцю участкасонза, конань кувалмоц 6,5 вайгяльбе. Тяса строявихть вете седень сооруженият, тяка лувксса седсь-эстакадась Инсарть и машина кить вельхкска, а стане жа Саранск – Рузаевка кить вельхкска путепроводсь.
Росавтодоронь вятись пачфтезе республикань Оцюняти сянь, што сай кизоть ки лангонь тя оцю проектть шумордаманкса арьсекшневи нолдамс миллиард цалковай.
Рабочай васедемать пингста корхтафоль Саранскяйса строяви тага фкя оцю автомобильнай кить строяманц колга, кона сотнесы Светотехстройста Победань ульцять Химмашста Гожувскяень ульцянц мархта. Тя кись сотнесыне ошть северо-западнай и северо-восточнай ширензон центральнай пяльксонц шарозь.
Корхтафоль и велеса кинь строямать колга. Мекольдень вете кизотнень кинь строямась велеса кассь сисемонь-крда, а кинь инвестициятнень марстонь объемсна пачкодсь 30 миллиард цалковайс. Поладови тя тевсь и сай кизоть, тя кизефксса Мордовиянь Оцюнясь стане жа получазе Росавтодорть лездоманц коряс надияфтомать.
Стане жа корхтафоль 2017 кизоня уликс китненди ремонтонь тиемать колга.
Рабочай васедемаса участия примасть Федеральнай Собраниянь Государственнай Думань депутатсь, Россиянь транспортниконь Союзть президентоц Виталий Ефимов, Мордовия Республикань Правительствать Председателец Владимир Сушков, «Москва-Нижний Новгород» Упрдор-нь ФКУ-ть начальникоц Максим Голдобин, «Прикамье» Упрдор-нь ФКУ-ть начальниконц тевонзон тиендисна Сергей Царьков.