Мордовиянь Оцюнясь Владимир Волков 22 декабрьста примась участия 2018 кизонь футболть коряс миронь чемпионатти и 2017 кизонь конфедерациянь Кубкати анокламать и етафтомаснон коряс Координационнай советть заседанияса. Пуромксть РФ-нь субъекттнень мархта видеоконференциянь режимса етафтозе Россиянь Правительствань Председательть заместителец Виталий Мутко.
Корхтафоль чемпионатонь ошнень-организаторхнень анокламань программаснон эсь пингстонза пяшкодемаснон квалма. Виталий Мутко макссь порученият региононь вятихненди, конат примасазь мировой футбольнай первенствань матчнень, сявомс анокламань кизефкснень личнай контроль алу.
Кда корхтамс Мордовиять колга, республикась вишкопнесы работать сембе направлениятнень коряс, кепотьксонди, «Мордовия Арена» стадионть анокшиц пачкотькшни 63 процентс. Сядонга вииста кармась мольфтевома работась аэропортонь пассажирскяй терминалть строяманц коряс. Строявихть гостиницать, кит и лия объектт. Вице-премьерсь Виталий Мутко отмечазе республикань Оцюнять Владимир Волковонь эффективнай работанц мундиальти анокламать коряс финанснень аф сатнемаснон пингстовок.
Видеоконференциять шумордамда меле Мордовиянь Оцюнясь етафтсь республиканскяй совещания 2018 кизоти анокламать коряс. Владимир Волков китькстазе, што пингта чемпионатти лядонды аф лама, тяка пингть сембе объекттне строямат 2017 кизоть аделамс. Сяс анокламань программать пяшкодемац веши оцю ответственность.
Корхтафоль тренировочнай площадкатнень строямаснон, футбольнай паксятнень анокламаснон, чемпионатонь объекттнень эса безопасностть обеспечендаманц квалма. Стане жа ванфтольхть ошень территориятнень благоустройстваснон мархта сотф кизефксне. Мордовиянь Оцюнясь китькстазе, што миронь чемпионатсь – оцю события республикань сембе эряйхненди. « Пяк важна максомс возможность эрь ломанти марямс-шарьхкодемс спортонь тя оцю илати анокламати эсь путксонц. Етафнемат аф фкя лацонь мероприятият, кепотьксонди, озафнемс од шуфтонят, скверхт. Примсемок участия тяфтама марстонь акцияса, республикань любой эряйти ули кода путомс эсь путксонц марстонь событияти, кадомс эсь пильгокинц потомкатнень мялямса», - отмечазе Владимир Волков.
Мордовия Республикань Оцюнять Пресс-службац