14 декабрьста Мордовия Республикань Оцюнясь Владимир Волков примась участия 2016 кизонкса ПФО-нь РФ-нь субъектонь РСЧС-нь территориальнай подсистематнень работаснонды итогонь тиемать и 2017 кизонди инголест путови задачатнень коряс учебно-методическяй пуромксса, кона етась Россиянь МЧС-ть Приволжскяй региональнай центранц начальниконц Игорь Паньшинонь председательстванц ала.
Мероприятияса участия примасть Приволжскяй Федеральнай округонь Российскяй Федерациянь субъекттнень эзга Россиянь МЧС-нь Главнай управлениятнень начальниксна.
«Учебно-методическяй пуромксоньке етай гражданскяй оборонаса, чрезвычайнай ситуациятнень инголдамаса и машфтомаса Россиянь МЧС-ть Приволжскяй региональнай центранц инь васенце мероприятиянь планонц мяльса кирдезь, - азозе приветствованиянь валсонза В.Д.Волков. – Оцю честекс лувондсаськ ширесонк инжиень примамать. Мордовияса улихть передовой наработкат населениять и территориятнень чрезвычайнай ситуацияда и происшествияда араламаснон коряс. Пуромксть программанц рамкаса минь старандаме, штоба сембе сонь участниконзонды удалаль ваномс ся объекттнень, конат лувондовихть эсь лацоннекс Приволжскяй округса».
Республикань руководствась лезнесь и анок сяда товга лезнемс населениять чрезвычайнай ситуацияда и техногеннай катастрофада араламанц коряс путф задачатнень эряфс етафнемаса.
Мордовиянь Правительствась нолни аф кржа средства МЧС-нь учреждениятнень тяниень пингонь техникаса, оборудованияса и снаряженияса козякофнеманкса. Мекольдень кафта кизоста республиканскяй бюджетонь средстватнень лангс рамафт передвижной теплодымокамера, управлениянь подвижной пунктонь 2 автомобильхть, оцю проходимостень оперативно-служебнай автомобильхть.
Маластонь кизотнень регионца арьсеф оцю объекттненьь строямасна, конат поладсазь Мордовиянь МЧС-нь Главнай управлениять инфраструктуранц. Сай кизоть Саранскяйса кармай строяф пцтай 3,5 тежянь квадратнай метрань площадьса 10 машиновыездонди пожарно-спасательнай центра. Эсонза кармайхть Приволжскяй поисково-спасательнай отрядть филиалоц и пожарно-спасательнай частсь.
Стане жа сай кизоть тиеви реконструкция Специализированнай пожарно-спасательнай частти, коса тяка лувксса кармайхть МЧС-нь сотрудникненди тренировочнай помещеният. Маласонза ладяви скалодром и препятствиянь полоса. Тяда башка, маластонь пингть арьсекшневи ушедомс кризиснай ситуациятнень пингста Управлениянь од Центрать строяманц.
Сембе ня объекттне строявихть 2018 кизонь футболть коряс миронь чемпионатти анокламатнень рамкаса. Учендови, што ся пингти населениять и территориятнень чрезвычайнай ситуацияда араламасна лиси лия уровеньц. И оцю путкссна тянди ули МЧС-нь сотрудникнень.
«Тяфтама условияса чрезвычайнай ситуациятнень инголдамаснон и машфтомаснон коряс Единай государственнай системать републиканскяй территориальнай подсистеманц работац занци башка васта стабильностть обеспечендамаса. Сонь работанц фалу кирдьсы контроль ала республикань Правительствась. Гражданскяй оборонань кизефкснень коряс инь главнай мероприятиянь планть мяльс сявозь тядде минь етафтоме 5 командно-штабнай ученият и 15 тренировка, - отмечазе Мордовиянь Оцюнясь. – Етафтф мероприятиятнень результатсна, тяка лувксса авариятнень машфтомаснон коряс практическяй работась, няфтезь, республикасонк управлениянь оргаттне и чрезвычайнай ситуациятнень инголдамань и машфтомань Единай системась анокт и теест вийс коре пяшкодемс путф задачатнень мирнай и военнай пингста».
Стане жа Владимир Волков азсь конкретнай пример Мордовиянь МЧС-нь сотрудникнень спасательнай работастост. Тяфта, колма шида тяда инголе спасательхне инголдазь Рузаевка ошса 22 кизоса церать эсь прянь юмафтоманц. Синь курокста састь ЧП-нь вастти и кошардозь од ломанть аф комотемс 50 метрань сереса вастста. Васенда синь корхнесть церать мархта, а меле фкясь спасательхнень эзда куцсь вышкать пряс и кошардозе эсь прянь юмафтыть валгомс алу.
«Тя пяк цебярь пример эсь прянь аф ужяльдемати, подвигти анококс улемаса, мезсь тиньцонт лувондови простой работакс. Работакс, конанди результатокс арсихть сядот, тежятть аралаф эряфсь, - китькстазе В.Д.Волков. – Содаса, што ламоцненди сятнень эзда, кит пуромфт тячи залса, сашендовсь васьфнемс тяфтама ситуация мархта, няфнемс личнай мужестванц и отваганц. Мялезе спасибамс спасателеньконди профессионализмаснон и любой минутаста лездома самати анокшиснон инкса. Спасиба теенть, кельгома ялгат!».
Азомок сай пингонди задачатнень, Игорь Паньшин азозе, што ведомствати эрявикс обеспеспечендамс РФ-нь Президентть В.В.Путинонь майскяй Указонзон эса азф показательхнень сатомаснон и етафтомс эряфс сембе поручениятнень, обеспечендамс 2017 кизонь конфедерациянь Кубкать етафтоманц безопасностенц, обеспечендамс общественнай безопасностть 2018 кизонь футболть коряс миронь чемпионатти анокламать рамкаса и лиятнень.
«Приволжскяй Федеральнай округса Мордовиянь МЧС-нь службась фалу ащи васенцетнень еткса, - мярьгсь И.В.Паньшин. – Кизоньберьфонь показательхнень коряс ули кода азомс, што республикаса инголи аськолкст тифт сембе ширетнень эса. Сембе вийса мольфтеви 2018 кизонь футболть коряс миронь чемпионатти. Арьсекшневи, што 2017 кизоня Мордовияв поступай аварийно-спасательнай техникань нинге фкя партия».
Мероприятиять пингста максфтольхть ведомственнай казнет. Мордовия Республикать эзга Россиянь МЧС-нь ГУ-ть начальниконцты Андрей Наумовонди казьфоль «За заслуги перед Отечеством» II-це степенень орденонь медальсь.
Стане жа Мордовияти казьфтольхть пожарно-спасательнай техникань инь од образецне, ламоцнень лаца конатнень эзда мзярс нинге ашель. Од техникась лезды виияфтомс и одкстоптомс региононь пожарнайхнень и спасательхнень материально-техническяй базаснон.