Мордовиясь стаки ванфнесы эсь вастонц инь оцю социально-политическяй кемошинь няфни региоттнень еткса. Кемонь баллхнень эзда кафксотне лездсть занямс 8 вастть Россияса тяддень мартть инкса «Петербургская политика» Фондть исследованиясонза.
Путозе тянди эсь путксонц Мордовиянь Оцюнять «EMBAWOOD» азербайджанскяй мебельнай компаниять директоронц Тамерлан Куркиевонь мархта васедемац. Пингстонза корхтафоль Саранскяйса оцю мебельнай фабрикать панжеманц колга. Производствась пуроптови «Рабэкс Групп» индустриальнай паркть видеса. Арьсекшневи, што нолдави инвестициятнень лувкссна пачкоди 800 миллион цалковайс.
Мордовиянь Оцюнясь китькстазе проектть социальнай ширде оцю эрявиксшинц – фабрикать эса панжеви несколька сядот рабочай васта, а стане жа отмечазе предприятиять тевс нолдаманц региональнай экономикати оцю значениянц.
Ашезь ляда мялень шарфтомада «РМ Рейл» компаниять Куба Республикав ваготтнень пачфнеманкса од соглашенияц. Контрактть условиянзон мяльс сявондезь, «РМ Рейл» компаниясь аноклай Кубати 225 вагон, коза сувсихть 50 хопперсь-сахаровозсь, 70 платформась и 105 вельхкс ала вагонць. Пачфтеви продукциясь интермодальнай схемать коряс: васенда машинань кить эзга, меле морява. Ваготтнень кочкамаснон коряс мекольце тефне пяшкодевихть Гаванань портса.
Нинге фкя событиясь, кона сувафтовсь мартонь рейтингти, - ляткснень башка кочкамаснон инфраструктуранц доступностенц коряс Саранскяйть 1 вастоц. Ошень эряйхнень 80 процентснонды ули кода нолнемс тевс вторсырьянди контейнерхнень. «Гринпис России» организациянь эксперттне ванозь 160 российскяй ошнень панжада даннайснон, итоговай спискати сувафтовсть аньцек 89-сь.
Васенце колма васттнень занязь Калужскяй областсь, Белгородскяй областсь и Чукотскяй автономнай округсь.