16 декабрьста Правительствань Кудса етась всероссийскяй семинар-совещания, конань вятезе Росиянь Правительствань Председательть заместителец Ольга Голодец. Пуромксса участия примасть Российскяй Федерациянь субъектонь вятихнень заместительсна, конат заняфт социальнай ширде вииякшнемань кизефкснень мархта. Мордовиять эзда, республикань Оцюнять поручениянц коряс, совещанияса участия примась Мордовиянь Правительствань Председательть заместителец Галина Лотванова.
Ольга Голодец эсь выступлениясонза тись итокт 2016 кизоти и азозень 2017 кизонди социальнай сфераса Россиянь Правительствать стратегическяй задачанзон.
Меле РФ-нь трудонь и соцзащитань министрсь Максим Топилин содафтозень совещаниянь участникнень населениять социальнай ширде араламанц коряс инь цебярь региональнай практикатнень мархта. Тянь коряс кулхцонтфоль семьятнень социальнай ширде араламань од форматнень и тянь вельде од шачихнень лувксснон касфнеманц коряс Мордовия Республикать опытонц колга докладсь.
Галина Лотванова азондсь мератнень колга, конат примсевихть регионца социальнай ширде араламань сфераса и лезнихть цебярьгофнемс демографическяй показательхнень.
«Мордовияса тевс сувафтфт дополнительнай мерат бесплодияда мирттнень-рьвятнень пчкафнемаснон коряс. 2016 кизонди арьсеф ЭКО-нь 375 процедурань финансирования. Сембе, кинди эряви, получазь медицинскяй тя лезксть, - отмечазе Галина Лотванова. – Одс шачихнень лувксснон касоманцты лездсь республиканскяй тядянь капиталть сувафтомац. Сон панневи эрь колмоце и сяда тов шачф шабатнень инкса и эрь кизоня теенза тиендеви индексация. Кода результат, республикаса отмечсеви иттнень лувксснон касомац, конат шачсть семьяса омбоцекс, колмоцекс и сяда товолдоннекс. 2015 кизоста сявомок касфтф социальнай пандомать лувксоц, кона нолневи жилищнай кредитть пандоманкса».
Семинаронь-совещаниянь участникне шарфтсть мяль жилищнай кредиттнень коряс процентнай ставкать пяльксонц пандоманц коряс республикать опытонцты. Региононь эряйхне тяни получсихть ипотечнай кредитт од эряма вастонь рамаманкса 5 процент алу. 2016 кизоста сявомок тяфтама выплатат получасть пцтай 2 тежятть ломанць, карьхцяфоль тянкса 32 миллион цалковай.
Мордовия Республикань Оцюнять Пресс-службац