Азфоль, што Петербургскяй международнай экономическяй форумса Россиянь Президентсь Владимир Путин азозень социальнай и экономическяй сферань виифнемань ключевой принципнень. Ётксост – ломаттнень и предпринимательствать сяда тов ширеснон кирнемац, ошнень и велень территориятнень петемасна-мазоптомасна, жилищно-коммунальнай хозяйствать одкстопнемац, внутренняй туризмать виияфнемац. Россиянь Президентть инициативанц коряс РФ-нь Правительствась кемокстась 9 процентста 7 проценттненди льготнай ипотекать коряс ставканц кирьфтаманц колга постановления, а стане жа тиф вете кизонди 2027 кизоть самс федеральнай финансирования мархта дорожнай тевонь вятемань планць. Китнень одкстоптоманкса и строяманкса субъекттненди ули нолдаф 5 триллиотт цалковай. Мордовиянь Правительствать Председателец Владимир Сидоров китькстазе, што регионть задачац кода можна сяда келиста нолдамс возможносттнень, конатнень макссесыне федеральнай центрась. «Профильнай министерстватненди эряви сяда активнайста полаткшнемс ширень кирдемань федеральнай мератнень эряфс ётафнемаснонды», - мярьгсь сон.
Экономикань, торговлянь и предпринимательствань министрсь Алексей Грибанов пачфтсь заседаниянь участникненди ёмла и средняй предпринимательствань субъекттнень ширень кирдемань мератнень колга, тяконь лувксса азондсь федеральнай мерань од пакетть колга. Тяфта, 9,5 процентс молемс ключевой ставкать кирьфтаманц, кредитнай каникулань максоманкса отраслятнень лувксс пассажирскяй перевозкань сферать сувафтоманкса, велень ипотекань программать ширенц кирдеманкса 7 миллиартт цалковаень нолдамать.
Регионть цифровой развитиянь министрть васенце заместителец Наталья Санина азондсь IT-сферать ширенц кирдеманкса уликс мератнень колга. Президентть Указонц коряс технологиянь сферань предприятиятненди колма кизос нольс тиф прибыльть лангс доходсь, тяка жа пингть аф кармайхть ётафневома проверкат. IT-компаниянь сотрудникненди работай льготнай ипотекань программа 5 процент алу – кафта ковста Мордовияса максф 12 заявка.
3,4 миллиард цалковаень питнес вете кредиттне примафт, фкя проектсь ванондови.
Промышленностень виияфнемань федеральнай Фондть экспертнай советоц максы льготнай займат республикань кафта компаниятненди: «Гласс Декор» РСК-ти- клянцеконь кядьгонь производствать коряс заводть строяманкса и «ЭМ-Кабельти» - литейнай продукциянь производствать ладяманкса. Нинге ниле проекттне ванондовихть.
Республикань 12 предприятиясь ётафтыхть эряф мероприятият, конат водендафт трудонь рынкаса сталмотнень машфтоманкса.
Велень хозяйствань и продовольствиянь министрсь Александр Кечайкин азондозе, што Мордовияса агропромышленнай комплексонь предприятиятненди 5 процент алу аф лама пингонь льготнай кредитонь возможностть тевс нолдазь 36 заёмщиксь, марстонь лувкссь арась 7 миллиартт цалковай.
Ширень кирдемань федеральнай мерань од пакетть мяльса кирдезь Мордовиянь спортивнай инфраструктурать виияфнеманкса нолдаф 42 миллионда лама цалковай. Тя средстватне максыхть тиемс спортивнай площадкат Ардатовскяй и Ковылкинскяй райоттнень эса, средстватнень пялькссна водендави Саранскяйса скейтпарконь строяманкса.
Штабть заседанияса ванфтольхть ЖКХ-нь сфераса ширень кирдемань мератне. Республикаса касфтф системообразующай предприятиятнень лувкссна, мезсь лезды предприятиятненди получамс ширень кирдемань мерат, инвестпроекттнень эряфс ётафтомаснон мяльса кирдезь, панчф 54 дополнительнай рабочай васта.