Мордовиянь Оцюнясь китькстазе, што властень оргаттнень, духовенствать, общественнай организациятнень марстонь вийсна водендафт межнациональнай и межконфессиональнай шарьхкодемать ладяманкса.
«Республикасонк эряйхть 119 национальностень представительхть, регистрировандафт 495 религиознай организацият, тяконь лувксса мусульманскяйхть, - отмечазе Артём Здунов. – Минь региононьконди тя пяк лама и тя цебярь, сяс мес ули кода аф фкя лацонь ширде ванондомс любой кизефкснень и примсемс правильнай решеният».
«Вероисповеданияс коре Мордовиянь эряйхнень ламошкасна (пцтай 93 процентсь) – православнай христианитт. Регионца пуроптф и парста работай МР-нь Оцюнять видеса православнай культурать виияфнеманц коряс Совет. Исламть спаведовандасазь республикань эряйхнень пцтай 5 процентсна. Конфессиятнень ёткса фкя-фкянди кородозь малаткшнемась – тянь эзда ащи мирсь и согласиясь. Именна тянь колга аф весть корхнесь Мордовиянь Оцюнясь Артём Здунов. Кепотьксонди, омбоце кизось ифтарса – исламса Рамадан священнай ковть пингста шинь озамда меле традиционнай ярхцамась, Мордовиянь Оцюнять мархта фкя шра ваксс пуромкшнихть республикань главнай религиознай конфессиянь представительхне – муфтиятонь оцюнятне и Русскяй православнай церькавонь Мордовскяй митрополиянь оцюнясь.
«Мордовияса сире пингста сявомок ладязь эряйхть русне, татархне и лия национальностень представительхне. Республикати тонатф тев, мзярда мусульманиттне поздравляндакшнесазь православнайхнень религиознай илатнень мархта и меколанкт. Мордовиянь эряйхненди тя тонатф прянь вятема», - азозе МР-нь культурань, национальнай политикань и архивнай тевонь министрть заместителец Альберт Сявкаев.
«Якташлар» МР-нь татаронь Региональнай национально-культурнай автономиянь председательсь Руслан Мухаев азондсь организациять планонзон и работань основной ширензон колга. «Якташларсь» вяти марстонь тефт татаронь Всемирнай конгресть, татаронь Федеральнай национально-культурнай автономиять мархта, мольфти марстонь работа национальнай культурать ванфнеманц и виияфнеманц коряс. «Мекольдень ниле кизоста участияньконь пингста ётафтф аф фкя лацонь уровенень 300 лама мероприятия, - азозе сон. – Тяконь лувксса ульсь «Татар Кызы Мордовия – 2021» конкурс, кона арась ни традиционнайкс. Минь активнайста водендакшнесаськ од ломаттнень – минь сяськиеньке лиссь международнай конкурсонь финалти и кармай няфнемонза республиканьконь Узбекистанца. Тяфтама проекттнень вельде минь тиендьсаськ содафокс Мордовиять». Май ковть песта Мордовияса ётафтовсь алятнень и аватнень ёткса каргс лангса бороцямать коряс Россиянь чемпионатсь, а маластонь пингть ни, июль ковть ушетксста, республикась примасы Всероссийскяй велень Сабантуйть.
Татаронь Региональнай национально-культурнай автономиять работаса тага фкя важнай ширесь – предпринимательствать и халяль-индустриять, внутренняй и выездной туризмать ширеснон кирнемац. Тядде марнек странать келес ётафневихть мероприятият Волжскяй булгариять мархта исламть примамста 1100 кизонь топодемать праздновандаманц мяльса кирдезь. Мордовиянь мусульматтне активнайста участвондайхть духовно-просветительскяй проекттнень и программатнень эса.
«Совет старейшин татар Республики Мордовия» региональнай национально-просветительскяй общественнай организациять председателец Шамиль Бикмаев кошардсь шарфтомс башка мяль советскяй мусульманскяй культурать виияфнеманцты и од ломаттнень гражданско-патриотическяй воспитанияснонды.
Артём Здунов китькстазе, што межэтническяй и межрелигиознай согласиять кемокснемац – тя общероссийскяй гражданскяй идентичностть и Российскяй государствать марстоньшинц ванфтомаснон юроц. Республикань руководительть инициативанц коряс ули пуроптф фалу работай консультативнай орган – Мордовия Республикань Оцюнять видеса мусульманскяй культурать виияфнеманкса Совет.
Тяда башка, региононь лидерсь макссь поручения 2025 кизоть самс государственнай национальнай политикань Стратегиять Республикаса эряфс ётафнеманц мяльса кирдезь сувафтомс Мордовияса уликс программатненди раздел, кона сотф республикань эряйхнень и инжихнень духовно-нравственнай и гражданско-патриотическяй воспитанияснон мархта.
Лятфтасаськ, ётай кизонь декабрьста региононь Правительствать мархта кемокстафоль «Сохранение и развитие национальной культуры, государственных языков и других языков в Республике Мордовия» Государственнай программась. Документсь, кона водендаф лездомс этнокультурнай ламошить и российскяй нациять единстванц ванфтомаса, аноклафоль Мордовиянь Оцюнять Артём Здуновонь поручениянц коряс.
Мордовия Республикань Оцюнять пресс-службац